星8卦｜「哥仔」捱足幾年 北上搵真銀 睇通市場價值撻訂不回港
呢個世界乜嘢都係自己揀，啱同錯唔到最後無人會知。要好似「哥仔」咁堅持，又真係無幾人，抵佢依家財來得易，死都唔放棄眼前嘅機會。
早幾年因為一啲機會，「哥仔」無端端俾人歸類，乜嘢前途都無晒，好彩有大公司幫手疏通，佢就默默承受住種種冷嘲熱諷，希望等到洗底嗰一日。等足幾年，「哥仔」至有機會北上，佢亦唔敢行差踏錯，初時由超級四、五線做起，跑綜藝收兩、三萬一集，但佢唔計較，總好過坐食山崩，依家升咗10倍價錢，可以30萬人仔一集，「哥仔」直情覺得自己行大運，搵到就存落銀行，唔敢亂Fing。
好似大公司見佢撈得掂，梗係希望佢回巢拍番劇集或節目，一家便宜兩家着，但「哥仔」一而再推job，成日話自己唔得閒，無非係要專心，明白唔好好似「師兄」發咗達又希望祖家接受，結果兩面唔討好。最估唔到「哥仔」本嚟諗住返屋企開演唱，期都攞埋，但左度右度，驚自己順得哥情失嫂意，又怕自己企錯位，而且喺上面唱兩隻歌已經係一場演唱會嘅歌酬，所以索性撻訂，無謂搞咁多事端，堅持留守己經經營嘅市場！
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
