47歲陳曉東（東東）推出新歌《燒光了火柴》，是2002年親自作曲的《劃火柴》延續篇，MV藍本取材自1997年其主演的電影《初戀無限Touch》，除勾起Fans當年追星回憶，亦令東東回想自己由怕醜仔變歌手的經過，原來當年簽約首間唱片公司，他只答咗3條問題便順利出道。訪問由講新歌變咗東東回憶錄，當事人愈講愈多，除自爆發育時期太瘦要飲肥仔水，更大講招積情史，連陣年初戀女友都唔放過。採訪：杜杜 攝影：朱偉彥 場地:九龍海逸君綽酒店
東東一直冇打算做任何歌的延續版，因怕效果不似預期，但見到《燒》歌詞就改變主意，他開心歌曲反應好，而且MV亦引起不少迴響，他稱歌曲有回顧含意，導演提議加入以往片段，「導演係套戲Big Fans，佢將電影剪咗個MV，跟住呢個藍本拍攝。」MV邀請兩位年青演員任主角，令東東想起不少拍戲點滴，「最深刻第一次拍戀愛嘅戲，真係用返自己初戀時一啲小習慣，如傾電話唔想講bye bye，講咗10分鐘你bye先定我bye先，又喺地鐵搗亂，好似馬騮咁喺碌柱度揈嚟揈去，攞我真實經歷去演。」
變萬人迷全靠阿媽果斷
東東自稱初中時只是一名唔起眼的薯仔，「中學前期唔受歡迎，戴住副厚厚眼鏡，又瘦骨仙咁，試過太瘦食過肥仔水，哈哈！」但暗戀失敗反成他變萬人迷契機，「阿媽覺得搞錯呀？為咗呢粒骰咁傷心，即刻帶我去電髮分返條界，配埋Contact lens，嘩！一分咗界配埋隱形眼鏡，熨直咗校服，哈哈！突然間打開咗個巿場，幾豐盛呀！幾受歡迎，（女仔）圍埋嚟同我傾偈，問我星期六得唔得閒。」
突然多女埋身的東東風騷分享初戀情史，「知佢鍾意我，佢又知我鍾意佢，對方寫咗封信畀我，但我又好衰。（因為多人爭？）係囉！囂張咗，中五放小息，嘩，咁肉麻嘅，當眾喺操場大聲讀佢封信出嚟。」雖然個女仔都有跟東東拍拖，但最終都是分手收場，「都係為了學業，為了不羈理想，迫於掉低這份愛（《流離所愛》歌詞），哈哈！老老土土嗰啲。」東東話自己衰但重情義，仍Keep住細個收的情信。問到初戀女友外形，他說跟太太王妤嫻都是眼大大的長髮美女，「我屬於奄尖嘅人，都有少少外貌協會，鍾意乖啲斯文啲，可愛啲得意啲。」
做家庭聚會歌手練大膽
問到人生中最深刻記憶，東東首推簽約首間唱片公司（寶麗金）的情景，當年簽約時只得17歲，中學還未畢業。「唱片公司問咗我3個問題咋！鍾唔鍾意唱歌？鍾意。鍾唔鍾意我哋公司？鍾意。簽畀我哋好唔好呀？好呀！哈哈！從此就打開咗我嘅天空！」小時候曾是合唱團成員的東東非常怕醜，一直只敢偷偷在沖涼時唱歌，「最記得要考小學，喺英文老師面前開聲考唱歌，第一句已尷尬到食咗10嚿酸梅咁，聽到自己把聲毛管戙。」全靠卡拉OK令他轉變，加上有家人「支持」，「嗰時好興KTV，我係屋企聚會嘅駐唱歌手，有人同我老竇講，『你唱得麻麻咋喎，但你個仔唱得好過你好多』哈哈！嗰時我15、6歲，唱啲經典廣東歌、國語歌，逢親有家庭聚會都會出嚟表演。」
東東愈唱愈認真，慢慢對入行產生興趣，「我喺KTV練歌可以唱足12個鐘，跟住真係去訓練（跟戴思聰老師學唱歌）。」有入行諗頭的東東即同媽咪講，「記得我哋喺街食緊河粉，佢第一個反應係『吓，你呀』，對我好冇信心，佢話你諗住參賽咩，我話我冇諗住參賽喎，佢話咁你點入行，我話我識咗個老師，老師有啲偏心我，帶我去見唱片公司。」成功簽公司的東東，1995年正式出道。
《星島頭條》新網站有更多精彩內容：http://www.stheadline.com/
