「35+」初選案續審，被告何桂藍今早於西九龍法院作供同意民主派過半為憲制武器，惟指憲制武器概念常見，可見於外國彈劾、不信任票等，用作權力制衡，但指「幾百萬人反對中央呢樣嘢，對中央係好大殺傷力呢個前提下，我同意民主派35+係大殺傷力憲制武器」。何桂藍又認為憲制危機不必然負面，「危同機都可以雌雄同體㗎啫」。
大律師Trevor Beel主問下引述戴耀廷曾形容民主派過半為「大殺傷力憲制武器」，何桂藍同意其為憲制武器，但「幾百萬人反對中央呢樣嘢，對中央係好大殺傷力呢個前提下，我同意民主派35+係大殺傷力憲制武器，其他咩打仗嗰啲我就唔同意喇」。何桂藍解釋「憲制武器」概念常見，某些政制內權力之間具制衡關係，如果行政立法司法機關「彼此冇實質阻止到佢、逼佢改變路線，稱唔上制衡」，於其他國家中彈劾、不信任票或否決財政預算案也會被稱之為憲制武器，有機會引發憲制危機，然而憲制危機不必然負面，「危同機都可以雌雄同體㗎啫」，何桂藍認為「如果現有paradigm （範式）容納唔到新現象嘅話，你就可以形容出現咗個crisis （危機）」。
何桂藍續指香港特首並非民選，而是來自北京欽點，代表北京意見，然而民選立法會代表香港人，若數百萬港人不同意的時候，或造成憲政危機。何桂藍又指從未試過民主派議會過半，「佢會引發乜嘢、引發危定係機，就睇當權者嘅反應」。
何桂藍另認為戴耀廷文章〈真攬炒十步〉與初選無關，因為何桂藍會形容戴耀廷為初選中的「facilitator（協助者）」，戴耀廷對議員「選完之後可以做咩佢係冇say嘅」。
何桂藍對自己屬於抗爭派直認不諱，自2020年6月起為其中一份子，何桂藍認為每次選舉均會因應情況出現偶然的派系，抗爭派乃因應2020年立法會選舉而衍生的派系，但不知會否延續到選舉後。何桂藍闡述抗爭派特點有四：首先，何桂藍認為必須承認當屆議會無法做到落實政策倡議，「我認為抗爭派嘅人係唔會同選民講，你選我入去，我可以幫你，或者達成某一個數目嘅議席，就可以達成五大訴求」；其次，抗爭派人士考慮任何行動「唔會以被DQ或者保住自己議席為首要考慮，簡單來講無論政府話你做啲咩嘢會被DQ，而我哋認為嗰樣嘢係唔合理嘅話，即使DQ都要做」；第三，抗爭派人士如果當選立法會，不可以只專注於政治議案或者重大議題，「每一條法例，每一條草案，都要用盡《基本法》賦予嘅職能，去盡責噉審議」；最後，抗爭派與其他派系分野不在是否願意與政府談判。何桂藍認為自己認同以上數點故屬抗爭派。《香港國安法》指定法官李運騰問第三點有何特別？何桂藍先旨聲明不針對任何人，解釋指有人只會認真審議政改、財政預算案或公眾關注的項目，其他小項目則輕輕放過。
Trevor Beel引述此前證供有指初選投票選民以「最黃」、激進及年輕為主，而何桂藍當時為新東票后。何桂藍指「我唔會用黃呢個字，可能好多人覺得黃就係好激進⋯⋯一個住深水埗40年由港同盟投到民協都可以好黃，佢可以完全反對暴力，所以我唔用黃呢個字」。何桂藍反駁說法指「我理解係完全相反，因為呢單案拉晒民主派所有光譜，每一個被告都活喺一個唔同嘅echo chamber（同溫層）入面，我所以見到2019年嘅激進派係好唔鍾意初選嘅」。何桂藍選前觀察輿情，「我當時喺連登（討論區），我係畀人話OMDB 2.0（over my dead body 2.0，即楊岳橋2.0）嘅⋯⋯所以我相信當時呢至少輿論上面，大家覺得我同楊岳橋係相似嘅」，又指「我亦都係激進派嘅一個攻擊對象，因為除咗OMDB 2.0，重有小麗老母2.0（劉小麗2.0）。」何桂藍再引用初選票站分站數據說明，自己在沙田第一城、馬鞍山等中產人士較多選區得票較高，本土派票倉將軍澳得票亦不俗，故自己也無法判斷哪26000人投票給自己。惟何桂藍希望投票給自己的選民「佢有睇過我政綱，認同我嘅方向，授權畀我去做嗰啲嘢，噉佢就投我喇」。
何桂藍憶述2019年12月左右「我就開始諗唔做記者，喺運動入面搵一個崗位去做」，最初考慮參與被捕支援，「但係好快選立法會呢個option就出咗來」。Trevor Beel問到何事驅使其參選，何桂藍答「2019年運動其中一個精神呢，就係每個人搵自己最適合嘅嘢去做。噉我當時有一樣好多人都冇嘅嘢，就係大家都知道個運動係冇領袖啦，亦都係faceless嘅」。李官問是否指無法辨識運動的代表人物？何桂藍順應指「但係好遺憾係大家辨識到我囉」，後又澄清「喺2019年我係冇做過示威者嘅，所以唔好話我係個movement 嘅任何人」，自言僅為一名顯著人物，但非泛民主派。
何桂藍續指於立法會選舉中投票是成本最低、最多人能參與的事，所以如果要讓運動得到民意授權，「立法會選舉係一個必須要行嘅路」，此外當時其他運動路線都停滯不前，而政府亦必然要回應選舉結果。何桂藍另指每次立法會選舉，大眾焦點均會落於「跑馬仔」、數議席，明言自己不欲議會路線單單藉反修例運動為多奪數席，反而「希望立法會選舉呢件事，可以推進場運動」。何桂藍其後補充「當時我要推進呢個運動，我第一件事係離開記者呢個行業」，2020年開設Facebook 專頁「宣佈參選嘅第一件事、張圖嘅第一句，亦都好清楚表明我已經唔係一個記者，希望大家唔好再淆混。當我講2019嘅時候，我指嘅係運動唔係個年份，至少喺我身上，場運動重未完」。
何桂藍說明香港民主運動一直存在一個問題，當大家聚焦立法會，便無時間心力推進運動其他方面，因此當時許多非常投入運動的人均不喜歡初選或者立法會選舉，憂慮其轉移視線，「到底議會係運動嘅一部分，定係話個運動嘅存在可以為議會攞多幾席？」何桂藍續指然而人民正因議會失效才走上街頭，故認為議會為運動其中一部份，「唔係一個非常之大部份，所以如果你話將個運動搬咗去chamber，我認為係消解咗運動嘅能量，甚至係馴化咗2019年呢場運動」。何桂藍認為自己一旦當選立法會，其職責為反映民意、監察政府、阻止行政機關越權，「同埋理論上盡責審議每一條佢哋交上來嘅法案同motion⋯⋯（但）呢樣嘢喺現行嘅立法會制度入面係做唔到嘅」。
法庭記者：陳子豪
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
