「35+」初選案續審，被告何桂藍今午於西九龍法院反駁《香港國安法》指定法官陳慶偉指初選並非浪費金錢時間時，直言「絕多數香港人心底裡知道中共治下爭取民主從來都係一場妄想⋯⋯」被法官李運騰打斷並指這非政治演說的場合。何桂藍不忿指「你問完問題又唔畀我答我覺得好唔公平」，陳官反駁其答案與案無關，何桂藍直指「其實你哋對立法會理解咁少，你點分咩係relevant（相關）咩係唔relevant？」又指「你呢個判斷係好有瑕疵嘅」。陳官嚴詞反駁其錯誤只應由上訴庭糾正。
大律師Trevor Beel引述何桂藍6月26日發佈的一條片段內指「民主派如果可以喺呢一個立法會選舉達成一個不可能嘅任務，攞到35席，攞到立法會過半嘅主導權，我哋就可以逼出一個北京冇可能接受到嘅局面，從而令到佢用更加瘋狂嘅方式去應對，要付出更加高昂嘅政治代價」。何桂藍解釋當時主流認為「唉橫掂全部都係會DQ㗎喇，噉重投來做咩呢咁⋯⋯」，自己便拍片回應指即使不可能達致35席，對方一定會以DQ 等方式阻止也好，但仍然認為要繼續舉行選舉。
何桂藍指出「點解話個選舉仍然要打落去，就係我哋明知係冇可能真係喺個選舉度攞35席，明知國安法會有所行動，我哋都要搵一個方法去展示當時香港人嘅政治意志，去證實香港人係有呢一個我形容係實力去攞到嗰個席數嘅」，惟強調「香港人嘅任何行動，其實最終都只係可以逼個政權做一個選擇，佢不得不回應，佢不得不喺鎮壓同妥協之間做選擇，但係從來都冇人逼佢鎮壓嘅」。
何桂藍續指如港人知道民主派不可能過半，然後「佢哋決定算喇噉我唔投票喇，噉北京嘅目的就達到喇。如果民主派嘅選民連票都唔出來投，其實北京根本就唔需要處理任何嘢。但係無論初選又好，正式選舉又好，如果香港人仍然去投票，畀香港、北京甚至全世界就會見到香港人本身係有攞到35席呢個實力同埋意志噉無論北京係用DQ去應對，定係選咗立法會之後定點樣，佢都要面對一個好大嘅合法性危機，因為全世界都會見到，呢個根本唔係香港人嘅意願，北京係透過操縱選舉來掩蓋咗香港人嘅真正意願」。
《香港國安法》指定法官陳慶偉再次問到何桂藍有否向戴耀廷提及初選浪費金錢時間？何桂藍回應指社運絕少能達成原初訴求，惟過程中仍能「建立一啲嘢，打開咗新嘅空間」，故非常不同意陳官結論，激動直言「絕多數香港人心底裡知道中共治下爭取民主從來都係一場妄想⋯⋯」法官李運騰打斷何桂藍，籲其冷靜並指這非政治演說的場合，何桂藍反駁指「你問完問題又唔畀我答我覺得好唔公平，即係法官就可以定義呢場嘢，然後put to me ，但係我又唔畀答」。陳官反駁指何桂藍答案與案無關，何桂藍直指「其實你哋對立法會理解咁少，你點分咩係relevant（相關）咩係唔relevant？」陳官反駁「我已任職法官25 年，或許不知道很多事情，但我知道甚麼是相關，甚麼是不相關」。何桂藍再直指「但係你唔唔知咩叫分組點票⋯⋯我就係要指出你呢個判斷係好有瑕疵嘅」。陳官嚴詞反駁其錯誤並非由何桂藍糾正，而是由上訴庭糾正。
何桂藍提到自己未曾親自向戴耀廷表達民主派「35+」不可能的說法，惟想起新界東第二次協調會議討論運用立法會權力條款時，未嘗提及一定要有35+作為條件，反映當時「35+攞唔攞到已經唔係大家關注嘅事情」。
Trevor Beel引用何桂藍初選前3張宣傳單張，何桂藍解釋由於「超區」參選人中相對可以接受岑敖暉的政治立場，故傳單中附上其頭像一同宣傳。傳單中指參與議會並不是因為仍然相信制度，何桂藍解釋不是指相信進入議會能爭取訴求，而是即使制度再不利，仍相信港人不甘屈服。至於「破局」，何桂藍則解釋指2020年5月底宣佈訂立《香港國安法》，美國對港政策作出相應反應後影響深遠，「好多人覺得5月底嗰個時空攬炒已經發生咗㗎喇」，「攬炒」故不再是目標，遂提出「破局」。何桂藍解釋「局」指「當權者會設立好多唔公平嘅規矩，然後威脅你一定要跟住佢呢啲規矩玩，令你覺得你必須要接受呢個就係現實，係冇alternative嘅」，續指「但係我哋而家就係講緊，只要香港人夠齊心嘅話，我哋係可以突破到呢一啲規矩，令到當權者冇辦法再透過呢啲規矩嚟到去控制香港嘅局面，噉佢就要諗，究竟佢係要回應民意呀，定係要用其他方法，再去掌握個局面」。
Trevor Beel再問「當香港正式步入攬炒年代」之意，何桂藍解釋當年5月中美各有反應之後，「唔少人覺得已經去到一個大國角力嘅level喇，噉香港重可以做乜嘢呢？」續指甚至由當時開始，港人關注美國政治甚於本港政治，不再反思香港人有何事可為，只在想美國可以如何對付中共。何桂藍表明不同意此一說法，回應指「噉樣只係將香港人以前對政治明星嘅祟拜或者依賴，轉移咗去啲外國政府嗰度，但係2019其中一種精神就係在於我哋每個人都唔可以再有一種靠人嘅心態，要去諗自己可以做啲咩，當時好多人就即係連香港人自己都覺得香港好似只係一隻棋子⋯⋯甚至有啲人覺得，我哋應該主動迎合我哋係大國角力之間嘅棋子角色，而我嘅睇法係香港人應該堅持返自己抗爭，做返自己嘅嘢」。
何桂藍再解釋「頂住因為攬炒而來的陣痛」意思，何桂藍解釋「因為我認為香港嘅運動，從來都唔係為咗要破壞香港，從來都係為咗去爭取一個更加好嘅香港，但係喺過程中我哋好難免要承受一啲嘅打壓」。何桂藍交代單張原有內容關注本地法律、初選意義、9月選舉部署等，5月底宣佈訂立《香港國安法》後所有單張內容一律改為立法影響，然而自己單張從未提及五大訴求及財政預算案。
法庭記者：陳子豪
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
