王馨平（Linda）近月多搞作，包括推出以父女情為主題的新歌《威嚴背後》，又宣佈9月舉行《女人馨情演唱會2023》（香港站），兩個計劃早想實行，無奈疫情影響一拖再拖。提到去年病逝的父親王羽，Linda坦認關係一直疏離，又嫌父親囉唆，長大了才覺悟，「有時咪俾佢煩吓，佢會舒服啲。」提到遺憾事，她忍不住落淚表示應主動向父親示愛，就算拖一拖也好，「想講嘅時候佢已經瞓喺病牀。」採訪：杜杜 攝影：朱偉彥 化妝:MOD – Crystal 場地: 本地舞台
Linda搵來伍仲衡製作新歌，歌詞依照她跟父親的關係而寫，當中提到「家中的他如領袖」，她稱父親絕對是嚴父，而「當天一巴的掌手」，就是講她17歲被父親摑了一巴，「讀高中時初戀俾佢知道咗，佢好唔高興就摑咗我一巴，『點解唔好好讀書談咩戀愛』，之後透過後母話畀我聽，佢好傷心好後悔打咗我一巴，我嗰時梗係嬲啦，puppy love之嘛，又唔係去搶錢打劫，做啲傷天害理嘅事，做咩要打我呢！？」當然現在她明白，父親只是太緊張她而一時衝動，之後亦冇再打過她。
老年王羽怕咗個女
Linda認為父親是個傳統中國男人，不擅於表達如何愛一個人，「我做歌手，佢從來冇讚過我，冇話過我唱歌或者邊隻歌好聽。」但她從很多人口中得知父親的另一面，「有間餐廳老闆係爹哋朋友，佢話我聽，『你知唔知你爹哋好着緊你㗎，佢嚟餐廳見到你啲poster，問我仲有冇多幾張，佢想收埋，仲好珍貴咁卷起攞返屋企』，喺人哋口中先知佢咁着緊我。」另外，Linda當年因為跟甄妮的合約糾紛在台灣打官司，王羽一直默默支持愛女，「我喺台北出法院，佢每次都會陪住我，好多事情你諗返就會明，原來佢心入面好愛我。」
Linda跟父親關係亦逐漸轉好，因她長大了更懂得體諒對方，「以前盡量唔好見，真係怕佢，同埋有時又嫌佢囉唆，以前唔識諗，其實真係唔使入心，有時咪俾佢煩吓，佢會舒服啲。」到王羽晚年身體轉差，兩人關係甚至有點對調，「慢慢佢開始會怕我𠻹！因為我會開始管佢，唔好成日喺出面同人飲酒飲咁多，唔好再乾杯啦！」
開騷分享愛情經歷
Linda製作新歌就是希望透過音樂令大家反思，要如何珍惜身邊人，她邊講邊喊：「我覺得做仔女可以將心比心，有時候個心放大啲，要知道爹哋媽咪唔會成日喺身邊，同屋企人有咩唔開心，要識得調整自己心態，唔會有遺憾。」她承認好有感觸，因為跟父親相處有遺憾，「好多嘢冇講出嚟，想講嘅時候佢已經瞓喺病牀，唔知佢聽唔聽到，明唔明。」問到如果可以重來一次，她會怎樣？「會主動拖一拖佢嘅手。」
Linda早於疫情前已想搞演唱會，因早在2017年已舉行兩場《女人馨情演唱會》上海站，但一直受場地所限未能開香港站，「呢個時候申請場地要等到出年，好彩兩個月前有人放9月期出嚟，問我做唔做，我覺得都係時候。」歌單方面，Linda除了演繹代表作，還會分享愛情經歷，「演唱會叫『馨情』國語解作女人深情嘅意思，我都應該有資格同大家傾吓人生歷練，帶一啲未必係我嘅歌畀大家。」她又強調仍然視唱歌為事業，會keep住製作音樂，「我係認真嘅，鍾意唱歌先入行，會諗返個初心，同埋覺得自己都仲可以唱多一段時間，哈哈！」
《星島頭條》新網站有更多精彩內容：http://www.stheadline.com/
