港股｜7月31日，部份時間有陽光，有幾陣驟雨，初時局部地區有雷暴，日間天氣炎熱。上周五美股高開高走，核心PCE符合預期，加上業績表現令市場收貨，美股樂觀氣氛持續，三大指數向上，道指升176點；標指跟納指分別升44點及266點。繼上週Google、Facebook 母公司META及微軟公佈完業績後，市場反應都唔錯，週四收市後分別有蘋果及阿馬業績，前者係眾多科技股中盈利最受經濟週期影響嘅科技龍頭，但目前市盈率已高達33倍，估值偏高下估計再升空間有限；而後者的雲服務估計進入低增長期，上週當微軟公佈完業績後，阿馬遜股價已先行調整。
息口有望見頂，歐美加房價開始回升，尤其英國租金升幅更驚人。雖然美國按揭利率已升至7%，但樓價卻未見大幅回落，反而喺上去半年庫存出現持續下降。美國樓市出現供不應求，早前市場一直預期衰退，過去一年發展商大幅減少供應，新樓供應本身已趨向緊張，二手樓放盤量亦大幅減少，主要係少業主正享受幾年前所申請嘅低息按揭，自住唔會輕易放售，據了解目前放盤量不足去年同期一半，市場估計美國樓價快將步入上升週期。從樓市嘅角度睇，美聯儲過去一年加息，根本未有效壓抑需求，由於資產價格並未出現預期中嘅大幅調整，因此美國消費能力未有大幅倒退。
至於中港股市呢邊，喺憧憬阿爺救市下，唔少大行轉晒軚，相繼出嚟唱好中概股，反映中概股嘅金龍中國指數，上周急升逾一成，而周五晚中概股繼續做好，帶動夜期及ADR重上二萬大關。
目前中港股市估值相對美股確係更為吸引，理論上值博率較美股高，唯一問題係一直未見買盤跟進，外資大行雖然改口話中概股幾好幾好，但身體卻很誠實，一直未見行動，即使上周大升市，成交亦唔到1,500億元。如今恒指已重返20,000點水平之上，若然日均成交未能維持1,500億元或以上，都只係空談。不過喺氣氛改善下，即使大市繼續玩區間上落，上落區間可能上調至19,000點至21,000點，暫時仍維持上落市格局。
相關文章：
港股市況｜恒指高開320點 優化政策落地 內房股狂歡 富力地產升28% 佳兆業升21%
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
