星8卦｜「高大」被「空靈」拋棄急娶妻療情傷 增肥唔准扮靚變態虐待「秀麗」
如果要數，「高大」最鍾意梗係「空靈」，奈何自己學歷低，對方要搵嘅係有個值得依賴嘅靠山，結果愛到要生要死，佢突然搵咗隔離公司嘅「闊佬」，仲生埋個女。不過「空靈」太古怪，竟然連女都唔要就出走。
「高大」受到情傷，自知卑微，但已經好紅，隨手搵乜嘢女人都容易上手，佢竟然搵咗最早期已經迷戀自己嘅「秀麗」，同「空靈」最相似係高大身材好，兩個人行出嚟好吸睛。兩個人喺埋一齊唔夠3個月就結婚，「秀麗」可以延續初戀梗係開心，但都無諗過「高大」會咁快求婚，基於年輕自己又鍾意，怕乜博一鋪，亦無諗對方動機。結婚初期，3個月啦，「秀麗」都覺得自己係世界上最幸福嘅女人。
但其間佢都發覺「高大」妒忌心特重，唔畀自己出街之餘，更加唔畀自己扮靚，最好就肥多十磅，對於一向注重外表嘅「秀麗」嚟講真係好難接受，佢有時偷偷化下妝都俾「高大」話唔知想去姣啲乜嘢人，有時唔食嘢想減下肥，「高大」就喺旁邊睇實話佢越肥越可愛。一個連外表身材都無權控制嘅人，心理唔出問題至奇。
喺「秀麗」體重比結婚前增加咗30磅嗰朝，佢就決定同「高大」攤牌，尤其係佢知道老公心裏面始終記住另一個女人，於是同「高大」講要離婚。最妙係「高大」一味沉默，完全唔畀反應，拖咗兩個月，「秀麗」搬走，仲寄埋分居書畀佢，但「高大」一直都無簽，幾年嚟「秀麗」一直催佢簽，但「高大」就好似無事咁，激到「秀麗」生蝦咁跳。
【相關文章】：
星8卦｜「正氣」娶「溫柔」打響如意算盤 遇着刁蠻阿媽遲早玩完
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
