獨家丨林子博唔急搵第二春以仔女為先回港見大恩人獲汪阿姐送福字真跡

喪妻近3年的無綫娛樂台前主播林子博，2021年8月帶同一對仔女移居英國展開新生活。早前一家3口返港度假，子博拜祭亡妻之餘亦入院接受切除口水腺瘤手術。闊別香港兩年，子博仍然感受到濃濃的人情味，絕非人走茶涼，尤其與曾出手支援他度過難關嘅「大恩人」阿姐(汪明荃)及家燕姐(薛家燕)重聚，阿姐更送上祝福，及「福」字真跡，鼓勵林子博一家好好生活。採訪：方騫平場地：Odans studio

林子博陪詠渝跳舞，乘機跳埋一份。

林子博努力融入囡囡世界。

「暖男老竇」為融入囡囡世界，陪學舞兼跳埋一份。

兩父女好合拍。

林子博支持囡囡讀藝術。

囡囡著緊子博搵第二春。

闊別香港兩年，一家人終於回港度假。

跟舊同事聚會。

和在港家人相聚。

52歲林子博跟一對子女相依為命，留港期間不時陪大女詠渝上跳舞堂，「暖男老竇」企埋一邊拍下練舞片段外，更跳埋一份。已經18歲的林詠渝由4歲起做童星，被指由細靚到大，子博爆囡囡係A0，有朋友卻想做媒，介紹28歲精算師富二代畀囡囡認識，但阿女冇乜反應，反而為他著急，仲幫他加入交友apps搵伴。

林子博係廿四孝爸爸，陪寶貝女進修舞蹈，又拍下練舞片段。

林詠渝有跳舞天份。

在港期間林子博大女詠渝進修舞蹈。

跳得有板有眼。

老師Odans指詠渝可以跳得放膽一啲。

兩父女跟跳舞老師Odans合照。

林子博於社交平台分享「當年今日」對比照，指詠渝重遇劇集《天梯》嘅牛屎叔叔。

子女將來最重要

對囡囡嘅好意，子博形容得啖笑，直言冇嘢緊要得過子女，甚至保證唔會顧住媾女掉低屋企：「𠵱家最親係佢哋，望住對仔女就會諗起過咗身嘅老婆，我唔會因為喪妻鑽牛角尖變得消極。」乜都以子女為先的子博，甘願放棄理想及第二春，「佢哋嘅將來比我嘅夢想更加重要，否則我唔會離港。希望栽培到佢哋大學畢業，有學士證書傍身，咁樣先對得住老婆。」子博坦言子女未必理解佢嘅苦心，相信大個咗總會明白。「好彩佢哋都算生性，即使比較鍾意香港嘅繁華生活，都唔會荒廢英國嘅學業。」

今次返港，子博第一時間去拜祭亡妻。

在英國的林子博，珍惜接送子女返學放學。

在港期間，子博入院接受切除口水腺瘤手術。

10年前子博結婚十周年，帶埋子女去台灣影家庭相。

10年後只得3父子女再赴台灣。

在港時子博仲要陪囡囡去追星，搵軒公(張敬軒)及林家謙。

天瑜爸爸好偉大

父兼母職嘅子博強調自己唔算係偉大爸爸：「只係盡返做爸爸嘅責任，好多父母比我偉大，好似因為醫療事故淪為植物人嘅7歲女童周天瑜，佢爸爸3年嚟一直為囡囡嘅事奔波勞碌，最近更患上惡性肌肉腫瘤及確診肺癌三期，佢嘅經歷比我痛苦得多，我有關注天渝爸爸狀況，自己曾經做過照顧者角色，明白到唔好打擾佢，默默支持及祝福佢就夠。」

林子博有關注慘變植物人嘅周天渝及天渝爸爸近況。

家燕姐讚有膽色

林子博在港1個月晚晚都跟朋友聚會，就算離開兩年友情依然不變。提到當日兩位阿姐曾出錢，助他應急醫治患癌太太，包括汪明荃送中秋月餅，原來鐵盒內藏拳頭咁大卷的千元鈔票，而家燕姐亦有封利是及介紹著名西醫。今次子博帶埋子女跟兩位恩人飯聚，答謝她們的關心：「阿姐見詠渝及卓楠已長高好多，追問兩人學業成績及鼓勵佢哋畀心機讀書，阿姐仲趁住上書法班，用毛筆寫咗個福字，蓋上印章『加持』送畀我哋；而家燕姐就讚我夠勇敢，居然膽粗粗帶住細路去一個陌生地方生活。」子博表示一家人去英國生活另一個原因係爭取親子時間：「當地交通冇咁方便，子女要靠我車出車入，喺香港佢哋只要手持一張八達通卡，就可以成日唔見人。」