星8卦｜「索姐」後生太爛滾 「型佬」執着過去夫妻情漸淡
如果唔係一次嘴藐藐嘅表情，大家都唔知「型佬」同「索姐」之間嘅關係已經咁緊張。一直兩個人嘅感情都係大家茶餘飯後嘅話題。「索姐」後生又真係幾放蕩，隨時同步有三至四個男朋友，收兵收到同期嘅女仔不知幾羨慕又妒忌。佢最放唔低嘅係「壞仔」，兩個人年齡、嗜好都好相近，「壞仔」最鍾意試新嘢，嗰陣興乜都放上網，「索姐」同「壞仔」親密關係完全無遮掩畀人知，但當時兩個人名氣無乜，所以引唔起話題。
後嚟「壞仔」飛起「索姐」令佢好無心機，求其係男人都拍吓拖，結果同「型佬」玩認真咗，仲大咗個肚，好多人都勸「型佬」唔好咁快決定，因為以佢仲好有潛質發展落去，負咗責任就要行人止步。「型佬」同「索姐」結婚後都好恩愛，因為有小朋友令佢哋覺得維繫一頭家嘅重要，但原來「型佬」一直有個心結，希望「索姐」可以交代一下當年同「壞仔」件事到底搞乜鬼，但「索姐」每次被老公問起都係沉默唔講，或者當聽唔到，最唔明「型佬」點解一直放唔低，一切都係以前嘅事，執着都係無謂。「型佬」開始喺出面拈花惹草，「索妻」心裏有個底，所以無乜表態，但久而久之就覺得唔開心，夫婦倆感情亦係面和心不和。
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
