10月26日，大致天晴。雖然Google業績達標，但雲服務增長未及預期強勁，結果其股價大跌近一成，反映市場開始唔接受偏高估值嘅美股。道指跌105點，標指跌60點，失守4200支持，10年債息重返5厘，納指加速跌勢，隔晚跌318點，跌幅達2.4%。

至今標普500指數約有25%公司已公佈業績，其中八成業績超過預期，但美股卻不升反跌，主要係年內累計升幅太勁，尤其係7月至8月為咗挾瓜空軍，市場購買力幾乎已透支。從市場購買力去睇，3月時滾存於美聯儲的隔夜熱錢尚有2.35萬億美元之多，目前已大幅下降至1.09萬億美元，減少過半，市場流動性正在收緊中。其中一個原因係財政部喺過去3個幾月，發行咗1萬億美元新國債，吸走唔少市場流動資金。

下半年美股投資環境變得極為情緒化，7月至8月狂挾淡倉，至9月及10月出現股債雙殺，金價更由7月高位2000美元水平，跌至10月最低1800美元，不過喺以巴衝突爆發後，美元重返2000美元附近。今年美股最強勁表現嘅，當然係AI板塊，電動車發展亦受市場關注，但相關股份表現卻未如理想，主要係息率高企下，高估值股份成為資金撤離對象。電動車行業進入淘汰賽，一向靠燒錢嘅電動車行業，無法喺市場覓得低成本資金，未來規模細嘅電動車企，只有靠併購生存。

至於港股呢邊，受到內地萬億發債救市刺激，恒指一度重返17500水平，再挑戰20日線不果，噚日高開低收，升不足百點，投資者未改變一有好消息就沽貨的習慣，指數一如過去兩次升近20日線便掉頭回落，昨市低位險守萬七關，收17085點，以日線圖走勢睇，今日萬七凍過水，睇嚟今個月月結前，再見年內低位機會甚大。

恒指又重演上月兩次急彈受制20 日線回落走勢，由於噚日回吐多於由前日低位16879至今早17465點高位升幅黃金比61.8%，跌穿17100點關，破底幾乎已無懸念。與此同時，接近期結日，期指噚日已開始轉倉，高開低走可能係維持低位轉下月倉，樂觀啲睇，低位轉倉或有利下月展開反彈。

---
星島X理大攜手推動永續發展 「ESG認證計劃暨嘉許禮」2023  把握報名機會 https://bit.ly/45kDhn5

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ