艾華利斯（左）最適合做夏蘭特背後的男人。Reuters
今晚曼市打吡，賽前大家都會談論奧拿拿同哈利馬古尼歐聯終於爭番一口氣，曼聯𠵱場波有無機會乘着近期氣勢贏埋曼城？
曼聯已經各項賽事3連勝，話雖如此，但只要我哋睇深一層，每一場波嘅比賽進程都係有大量沙石，3場波都係圍住個禁區嚟搓，但滲入唔到敵方禁區。只要諗番3場嘅入波，就可以發現到曼聯每一場波都係要靠球員挺身而出，第一場麥湯米尼嘅神來之筆補時連入兩球反超，第二埸靠達洛治超靚遠射得手，第三場就係馬古尼透過1次角球，產生出1個斬波頭槌入球。顯示得出都係球員質素加上少少運氣所產生，面對實力雄厚嘅曼城，真係可以再一次發生？
3連勝只係假象
失誤眾多都係曼聯其中一個死症，曼聯已經連續兩場都輸十二碼，幸好奧拿拿歐聯尾段撲出極刑保住3分。同時成套Build Up由4後衛變成3後衛亦都經常斷纜，好易被對方打反擊，造成人多打人少，面對二線球隊可能有得救番自己嘅失誤，但對上一針見血嘅曼城應該會受到嚴重嘅懲罰。
曼城近期都有唔少利好嘅消息，有洛迪卡斯簡迪復出，改善中場梳理，控制節奏嘅能力。又有重大發現祖利安艾華利斯原來最適合做艾寧夏蘭特背後嘅男人，經常後上插入搞掂。剛剛歐聯亦都作出唔少嘅輪休，體力亦都佔號上風。
總括而言，曼聯呢場波攞1分都非常因難，睇嚟都會俾曼城輾壓，但作為猜波台主持，都希望聲音旁述一場刺激而精彩嘅比賽，同時又要避免自己入「講膠所」，只好勉勉強強推上盤一波。Willhappy
-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
