11月30日，大致多雲，日間部份時間有陽光及較為溫暖，晚間風勢較強，天氣稍涼。美股隔晚較為淡靜，市場靜待12月中議息。標指升至4600前阻力唔細，但預期息口見頂及明年減息情況下，沽壓亦有限，反而見有資金逢低吸納。

10年債息回落至4.27%，炒減息係美股大方向。雖然目前10年債息較現息率低1%，已反映明年減息幅度，但標指平均市盈率已升至25倍，投資回報率只有4%，仍較利率低1.25%，亦較10年債息低0.27%，令美股近日升勢停滯不前，但市場對美企前景仍有一定信心，美股高位整固，高居不下。

財政部修正第三季GDP增長率至5.2%，高於初值的4.9%，亦高於預期5%，修正部份來自於企業加大投資，反映企業對前景感到樂觀。另外，政府支出高達5.5%，高於平均值，跟明年總統大選有關。投資者對美股前景較有信心，主要係美企嘅管理層相當了解投資者需要，適當時候利用回購去減少公司股票流通量，從而令每股盈利上升，買盤長期多於沽盤，呢個正正係美股長升長有嘅原因。

好似早前通用汽車（GM）面對罷工潮影響，管理層仍計劃明年提高派息33%，另外啟動100億美元回購計劃，股價無懼罷工潮升一成，投資者自然唔會隨便沽出股份。

至於中港股市呢邊，管理層只顧自身利益多於投資者利益，股價高位就趁機印公仔紙集資，喺市場抽水後，股價卻一直向下炒，大股東總係高位套現走人，完全當小股東係韭菜。結果令長期資金失去信心，為免一再被割成為韭菜，只有選擇離場，令場內資金面薄弱，成交低迷，市況每況愈下。

港股Q3業績公布期接近完結，繼京東（9618）、阿里（9988）業績後股價插水後、美團（3690）同樣績後勁跌一成，睇返呢三間公司嘅業績，實際上又唔係太差，但股價喺績後大殺，真係有咁啱得咁橋，飛機撞紙鳶，擺明似係有心人利用業績搵食，不斷割投資者韭菜。港股資金面薄弱，入場資金少得可憐，實在難以跟空軍淡友對抗，好友唔單止係相當被動，完全係任人牢割。大戶速戰速決，市場買賣盤少，大戶相當容易控制步速，急升急跌，任由大戶舞高弄低。

雖然今年3月後阿爺開始放水，但民間融資不似預期，中港股市自然一沉不起，跌至現水平，唔少股份已跌至合理估值，低位係有資金儲貨，可惜一個Q3業績公布後，重磅股全部見光死，難得氣氛略有改善下，投資者信心又被打沉。尤其是指數成份股，仍以不景氣居多。

今日11月結，若能續守10月低位16879點及16800點關口之上，以及企穩17000關樓上收，港股則有望喘定，但反彈阻力重重，即市阻力17150至17200，至於多條移動平均線其為遙遠，目前只能見步行步。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ