陳奕迅(Eason)相隔5年推出新專輯《CHIN UP！》，除有影帝梁朝偉驚喜現身新歌《社交恐懼癌》MV外，化身大廈清潔工的85歲老戲骨梁愛更有話題性。相約愛婆婆做訪問唔容易，精叻嘅佢怕被騙，拒絕接聽陌生人電話，後來被記者誠意留言打動主動回電。從影超過半世紀，愛婆婆睇住唔少巨星成長，欣賞以往藝人全部捱出嚟，唔似新一代得個樣，又激讚Eason及發哥最敬老，「我老眼昏花啫，但冇睇錯人。」她透露已簽下不急救同意書，笑言：「收夠籌就走，好死好過發達。」採訪：方騫平
愛婆婆以緣份安排形容今次訪問，相約影相，她以「瘦到皮包骨，得返85磅。」為由拒絕，堅持唔曝光的她自嘲：「我唔想畀人睇到呢個婆婆好淒涼，臨老震震吓，你知有啲香港人知少少扮代表。」
發哥車出車入夾餸照顧
近年愛婆婆因健康問題甚少演出，但肯為偶像Eason出山：「我𠵱家鍾意玩就玩做就做，有精神就淨係做自己友，好似Eason咁就破例拍攝。我最鍾意佢正氣，哈！我呢個人好衰㗎，睇靚仔正氣就ok。」愛婆婆大讚Eason好nice，為她上落車開關車門，仲私人醒她一萬元大利是：「其實佢公司畀咗酬勞我，所以我話唔要，佢叫我『乖啦』塞返畀我，唔係錢嘅問題，係懂得敬老，你估阿婆有寶咩？雖然我老眼昏花啫，但冇睇錯人。」另外愛婆婆都激讚周潤發：「呢個世上，一個我個仔，一個發哥對我最好，好錫我。我同發哥仲有聯絡，佢好乖仔，由以前一齊拍戲到𠵱家行山聚會都會車出車入，飲飲食食唔使我夾錢，仲會幫我夾餸斟茶，仲霸氣同我講『老嘢，你慳返啦我大把錢，有得食就食。』」
城城冇錢搭的士要借宿
有「御用工人」之稱的愛婆婆拍戲無數，開工時坐過勞斯萊斯，好景時食魚翅慶功，坦言等於做咗3世人已冇遺憾，不過，她稱自鄧萃雯、黎耀祥一代後冇再睇港劇，只會睇返凌波劇作及聽內地歌手周深嘅歌，間中又會追吓韓劇。問到對年青藝人印象？愛婆婆答得風趣：「我唔夠眼力睇唔清楚，所以一個都唔識，只留意到啲姐姐死都要靚；着高踭鞋行山；做綜藝嘅就越嚟越少布，條裙短到幾乎見到條底褲，唔識得尊重自己。」她見證以前啲阿哥、阿姐唔係靠樣，個個都係捱出嚟：「好似郭富城日以繼夜拍《太平天國》，佢住港島區，冇錢坐的士返屋企，唯有喺黃日華屋企借宿。」一把年紀的愛婆婆唔止分析力強仲仍然有火，她自爆睇新聞見到騙案條氣會頂住，仲成日對住家中觀音鬧人：「真係(苦主)個腦生草嘅，咁冇分析力，無需學歷但人工高，邊會有咁大隻蛤乸呀？聽到都調頭走啦，衰啲講做『雞』都要除褲啦，唔貪咪唔俾人呃囉，喺街排隊攞著數我都唔要呀。」她乘機訓言：世上唔會有不勞而獲。
獨居沙田屋邨活得消遙
85歲梁愛除咗有齊3高，心臟最唔妥，因為揼唔到血上腦，試過3次暈倒要送院搶救，𠵱家暈低次數仲越嚟越密，坦言對生死做晒心理準備：「我聞到嗰陣味，唉！捱得一日得一日，我行得唔好又力不從心，所以已簽咗不急救同意書，唔『玩』喇！搭通天地線夠鐘就走。」梁愛喪偶26年，晚年經歷56歲兒子隱性心臟病猝死之痛，對於人生睇得好開：「做人要認命，上天要人就要放人，後生求安樂；老來求去得舒服，好死好過發達。80幾歲仲唔『收工』？唔好霸住人哋個位。」她自爆死後會捐遺體做研究，立志做大體老師。對於老年生活，愛婆婆獨居沙田區新落成屋邨，樂得消遙自在，生活絕對ok。愛婆婆還幽自己一默：「因為怕跌唔可以彎身及爬高，𠵱家自己高不成低不就，好似水晶咁矜貴跌唔起，好多生活上嘅嘢交由鐘點負責。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
