禍從口出、言多必失？「牛下女車神」李慧詩退役後轉型教練，她早前在杭州亞運任電視台旁述員，因一句「希望日本贏中國」引發軒然大波，事隔數月，李慧詩趁聖誕假期在社交平台訴心聲，直言耿耿於懷，「當時諗唔到點處理，一直屈喺心度」。
籲真心為港者「唔好再做打手」
她表示，自己會「從錯誤中學習，之後直播謹慎啲」，又言自2019年起，不時在網上被人身攻擊，稱自己是土生土長的香港人，真心希望如果真的愛香港，「唔好再做打手」，一齊用行動令香港變得更好。
「由始至終都唔係激進分子」
李慧詩26日在社交平台回憶指，退役後有幸做live節目，好驚自己做得差，講錯嘢，所以一直唔敢鬆懈，不過愈驚愈錯，直播每一日都有講錯嘢，最嚴重係講咗「希望日本贏中國」。她表示，當日第一次報線道，每10秒出一隊，到日本出場時，講了以上7個字，「當刻就知唔對路，所以講中國個國字高音咗，之後就到拍檔馬詠茹介紹中國出場，無得補救，心諗⋯⋯大鑊，點解唔講『唔知日本係咪準備好贏連贏幾屆嘅中國』，又或者『日本要贏中國都好高難度』呢？」
李慧詩直言自己「由始至終都唔係激進分子」，直播亦有講希望印度、黎巴嫩、難民會贏，「但作為旁述，講其他隊贏國家隊就令人髮指」，自己都覺得接受不了。她稱，今次陷阱無得怨人，唯有經一事，長一智，從錯誤中學習。
她在文末更抱怨：「自2019，間唔中就有人身攻擊嘅留言出現喺FB，我只係個土生土長嘅香港人，真心希望，如果可以，如果真係愛香港，不如唔好再做打手，一齊用行動令呢啲地方變得更好？」
網民反應兩極 建制議員炮轟
李慧詩當時直播言論一出，新民黨立法會議員李梓敬數日後便在其YouTube頻道狠批她「數典忘宗」，事件在內地社交媒體亦引起熱議，不少內地網民口誅筆伐。至於李慧詩的回憶文底下，網民反應兩極，有網民支持她，反問「邊條法例一定支持中國隊？」但亦有網民指稱其政治立場是「黃」，「但做咗又唔敢認。明明係想日本贏，咁咪認囉！何苦幾個月後走出來長篇大論，然後跪咗。」
去年獲授銀紫荊星章
36歲的李慧詩是香港體壇傳奇，屢在國際賽奪獎牌，曾在倫敦奧運贏過凱林賽銅牌、東京奧運爭先賽銅牌，世錦賽贏過3金2銀3銅、亞運贏過5金1銀1銅。李慧詩先後3次獲特區政府授勳，2011年獲榮譽勳章、2017年獲銅紫荊星章，以及去年11月獲授銀紫荊星章。
當時的授勳函稱：「李博士獲頒授銀紫荊星章，以表揚她長期以來的超卓體育成就。李博士在倫敦2012奧運會女子場地單車凱林賽中取得銅牌，其後在東京2020奧運會女子場地單車爭先賽中再次奪得銅牌，成為首位在兩屆奧運會均奪得獎牌的香港運動員，為港增光。」
---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
