近期話題電影《金手指》，雖然可觀性普通，但香港人尤其是長者，仍然排山倒海入場。點解？因大家都想走入時光隧道，重溫一幕又一幕昔日的「荒謬香港」。
當中尤其荒謬的是，股市竟可以任由大鱷造市。於上世紀70年代初，交易所負責人與一眾大鱷，根本蛇鼠一鍋，其時未有港交所（388），也未有廉政公署（ICAC），唔亂籠就奇！
片中尤其震撼觀眾，為扮演囂張大鱷的梁朝偉，用鈔票點雪茄，意氣風發口出狂言：「印股票即印銀紙，我想印幾多就幾多！」
真唔真？一半真！當年印股票，只要夾埋大班利益掛鈎者（包括金融證券界人士及傳媒），組成「合唱團」，必引得散戶蜂擁入局受劏。這種局其實如今也有，不過冇咁猖狂，但手法仍是一樣，引散戶水魚上釣。
股市亢奮 折讓少少批股
一直以來，整個股市「遊戲」設計，根本益晒大鱷，可以「合法地」上下其手「做野」。N年前，某華資大集團行政總裁酒後吐真言：「碌Sir，散戶真係好慘又好傻㗎，例如我老闆，真係叻到飛起，股市狂升佢又賺，插水也同樣賺，玩到班小股東殘！」
呢位大老闆（當然不能開名）的招數，是當股市亢奮性上升時（周期性經常有），佢就聯絡相熟基金經理、券商及投資銀行家，折讓少少批股，「益」呢班利益掛鈎者。當然之前老闆也會「做野」，搞到旗下股票升到「靚爆鏡」！然後就可以似《金手指》中梁朝偉所講，「印股票等於印銀紙」。
大市插水 將公司私有化
咁大市插水時又如何？請睇睇各大集團股價與資產值，自會發覺大部分上市公司股價，完全反映唔出公司真正資產價值。點解？因七、八成股票長揸在大股東及相關人士手，外間根本冇得炒，故此價錢長期被人為撳低。
當大市跌到七零八落，隻隻股的價錢殘到飛起時，大股東立即又可出手「做野」。先再推低個股價，令小股東冇晒癮，感覺買錯貨，希望投降止蝕。此時老闆就會一招「鯉魚翻身」， 用高1至2成價將公司私有化。小股東唔跟就繼續被綁；跟就眼白白被割韭菜。遊戲就是如此，絕對無公平㗎！
資深傳媒人 曾智華
相關文章：
《金手指》票房大收 梁朝偉劉德華等角色現況如何？有人隱居及破產 也有人仍任公職
---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁：https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
