古往今來「狀元」一詞都像被光環包圍，閃亮人生從登科及第一刻開始。網上近日流行把藏於櫳底的陳年亮麗成績單貼堂。在facebook專頁「90年代回憶 (新版)」上載的一張2003年會考10A成績單，10支火箭震動網民眼球，也帶出了十優狀元鄺文傑自放榜後21年來的跌宕人生；而fb專頁內一紙無名氏的會考8A成績單，卻讓網民反思了讀書叻是否等於搵錢叻的直向思維。
廿年人事幾番新 樓主：十優成回憶
2003年沙士一疫，當年高考及會考如期舉行，就讀屯門順德聯誼總會梁銶琚中學的會考生鄺文傑，在疫情陰霾下考獲超級亮麗成績，是當年17位十優狀元的一份子。如今，鄺文傑也不吝嗇地在facebook上載成績單湊近日的「貼堂」熱鬧。
廿年人事幾番新。再看這張含金量極重的10A成績單，在十優狀元鄺本尊筆下卻已輕描淡寫成為「一個回憶」，但從帖文內容，可見由戴口罩應考至今的21個年頭，在鄺文傑身上卻發生了大學選科、就業、轉跑道、追尋理想、戰勝癌魔的人生大事。
十優狀元自述全文逐張睇↓↓↓↓
樓主：人生點會咁易一帆風順
如此驚濤駭浪，讓鄺文傑看透了人生，在帖文感慨地指「生命短暫，人生點會真係咁容易一帆風順，唔好逼死自己」、「好好做自己，好好生活落去～」。
十優狀元自述後網民有感而發↓↓↓↓
網民：疾病唔會因為十優狀元而避開
回應的網民被鄺文傑的人生觀感動到，讚嘆成績驕人外，還自覺健康才是無價↓↓↓↓
•疾病唔會因為十優狀元而避開，亦唔會因為考試肥佬要教訓！所以錢財無健康咁重要！
•健康最緊要，好在而家好返。10A應該好多選擇，起碼拔咗尖唔使考高考賺咗一年。把握時機，活在當下，做到啱自己嘅嘢就最有意義最開心。
•成績換取事業，事業換取生活質素，生活質素換取快樂，資本主義的路徑，但其實仍有很多路徑可以尋求快樂，視乎心中那把尺。
•10A⋯⋯真係好勁，好多人都會諗10A會做啲咩師乜師，你帶出嘅訊息係成績唔係最重要，跳出框框，而係點面對人生更為重要，祝你日後身心都咁健康。
•雖然拎十條A真係好犀利，但我認同搵到自己人生嘅方向比十條A更有意義，共勉之。
•過咗30歲呢個年紀開始明白健康的重要性......
有網民則大謝鄺文傑——「好少狀元會無私分享十年後二十年後的生活，好感謝你分享一段經歷給我們。大家健康，加油」、「好勁，好似暫時係第一個公開以前成績同講而家情況的帖文。祝福樓主身體同心靈都健康，開心生活」。
十優狀元自述後網民有感而發↓↓↓↓
鄺文傑相關新聞：iBanker轉行做表達藝術治療師 鼓勵創作紓解情緒
8A成績單 網民反思成績好與發達關係
至於「90年代回憶 (新版)」近日被上載的一張1992年的8A成績單，任憑網民苦苦追問目前是否高薪厚職，有否當上醫生、律師至為官，估計現時年屆45歲左右的樓主暫無現身透露，更不知是否已上岸悠哉游哉。
但在網民熱列討論期間，卻談到了讀書叻是否等於搵錢叻的話題。有人指「成績好同發達係兩件事，成績好跟機會多就有關」。
8A成績單逐張睇 + 網民大反思↓↓↓↓
網民：人生唔同階段有唔同成績表
有網民人間清醒，感嘆其實幾可悲，「呢個社會只會問你咩職業，係咪賺好多......」「唔會有人問你搵唔搵到心儀工作，發唔發揮到，做得開唔開心」、而「個個狀元唔係去讀醫讀Law（法律）就係Global business（環球商業學），其實反映咗社會嘅價值觀出咗問題」。
事隔多年，有人稱讚樓主「真係勁」之餘，也指出「（人生）唔同階段有唔同嘅成績表，而家應該係健康報告、銀行結餘、資產負債表、家庭狀況、退休計畫嗰啲」。還有網民搞笑地自稱「知憂生」，同樣有8憂——「憂柴、憂米、憂卡數、憂開支、憂份工、憂荷包、憂生活、憂呢樣同果樣......」。
8A成績單逐張睇 + 網民大反思↓↓↓↓
會考屬舊制考試
香港中學會考（Hong Kong Certificate of Education Examination，簡稱會考）和香港高級程度會考（Hong Kong Advanced Level Examination，簡稱高考）均屬舊制考試，是如今考DSE（Hong Kong Diploma of Secondary Education Examination，縮寫為HKDSE，香港中學文憑考試）新一代學生未曾經歷過的。
公開試相關新聞：
港男曬陳年A-Level火箭成績 自爆收入和會考XX分？ 阿Sir封$1.2利是意外爆紅
----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrg
