羅子溢和陳自瑤（Yoyo）在《婚後事》再演夫妻，因為劇集夠爆畫面夠踩界而被網民追捧，兩人均大讚對手好劇本好，才有好成績，特別是入行19年的子溢，得到「私人視后評審員」老婆楊茜堯肯定：「今年有機！」，更首次聽到有望衝擊「視帝」的讚賞，佢笑言當自己攞咗，非常好笑。而同樣獲讚的Yoyo，再三澄清並非本色演出，瘋狂嗌「離婚」純劇情需要。兩人更大談婚姻及出軌論，子溢隔空狂冧老婆，又甜又好笑，真係恭喜晒羅太。採訪：杜杜 攝影：Stanley 髮型:JanChiu@IL Colpo 化妝:Evelyn Ho 服裝:@Sandro
子溢和Yoyo相隔13年再合作《婚後事》，兩人大讚對方成熟不少，默契更勝從前。首任女一的Yoyo，壓力好大，慶幸拍檔是子溢，「第1次做咁重要角色，情緒波動好大，好難演繹，唔知人哋覺得你得唔得？播出之前好緊張。」而拍了10幾年劇的子溢，覺得角色好有發揮而特別珍惜。
子溢唔敢同老婆睇親熱戲
劇集播出後反應極佳，內地觀眾亦給予高度評價，兩人都好開心。Yoyo覺得最感動是引起觀眾共鳴，「話『你演活咗好多女性心聲』，有啲寫埋長文講親身經歷畀我聽，睇到好感動又心痛。」而子溢的信心除來自觀眾，還有他的「私人視后評審員」楊茜堯，不過親熱戲就唔敢跟太太一齊睇，「我比較膽小，哈哈！第1集有啲讚賞聲音，我就話『老婆你不如望一望，覺得有咩改，或者好唔好，客觀啲話畀我聽』。」結果太太睇了半part已有結論，「老婆」Yoyo嫌他講得唔清楚，索性羅太上身代為轉述，「做得好好呀，得㗎嘞，今年有機！哈哈！」子溢笑得勁冧：「佢話今年有機，我話多謝視后多謝視后，哈哈！」
子溢坦認一向好重視太太的評價，得對方肯定就好有信心，「周圍問人『有冇睇套劇？』」對於有否信心衝擊視帝？子溢就不強求，「梗係想啦！坦白，唔係清高，都係隨緣啦！」入行19年首次獲得大量讚賞，令他好有成就感，「有人話『佢食咗咩藥，突飛猛進』；『呢個可能係羅子溢代表作』，令人好開心嘅留言，咁多年未睇過留言有『視帝』出現，我以為自己攞咗嘞，哈哈！」Yoyo同樣認為有口碑較奪視后寶座更直接，「好多留言支持、鼓勵同讚賞，話我做得好好，『視后級演技、等你攞視后』，要得到觀眾認同好困難，得到已經好開心。」
Yoyo強調跟劇本咆哮演繹
子溢表示首日開工拍法庭戲，狀況比想像好，覺得「好老黎」，更認為當父親後亦有助投入角色，「做咗爸爸，睇對白個心已好痛，幻想真係拎走我個女，真係心如刀割，但又要放棄。演得咁真，因為動咗真情！」Yoyo笑指當日要奮力應接子溢視帝級演技，「嗰日我嘅狀態係差啲，都盡咗力，唔係點接到佢啲戲呀，哈哈！」跟老公王浩信屢傳婚變的Yoyo，指老公因開工冇時間欣賞其精湛演出，並澄清演得投入並非親身經歷，「成日問我係咪本色演繹呀？又或者係咪同真嘅一樣？其實我真係忠於劇本去演繹咋！劇本點寫我點演。」她又以瘋狂嗌「離婚」獲讚一幕作例子，「嗰場係咆哮唔係尖叫，使唔使咁激烈呀？！劇本真係咁寫，我忠於原著3句『我要離婚』，後面括住『咆哮』，真係盡力去呈現，最真實嘅『張明芯』。」
子溢妙答精神及肉體出軌
劇中經常提到的精神及肉體出軌，問到那種最不可原諒？Yoyo認為要睇情況和程度決定，「有時男人見到個靚女傾多兩句，會有嗰吓思想上出軌，但係佢識唔識好快咁收返？要知道界線，識得收，如果純粹同靚女傾吓偈，有一刻諗吓，人之常情，好多人都會接受到，但當你真係愛上嗰個人，甚至肉體都出埋軌嘅話，就接受唔到。」子溢就直言精神和肉體出軌同樣出事，「最緊要唔好畀人知，畀人知兩樣都大鑊，哈哈！」Yoyo強調感情唔係睇錢，「要睇到你對佢嘅愛，你有冇心，處女座都幾講心唔講金。」跟太太同樣是處女座的子溢，相當認同。他追求細水長流，平淡過一輩子的婚姻，「我非常唔識製造浪漫，或者搞儀式感，但我相信最後會白頭到老，臨離開人世仲可以拖住嗰個女人，呢個先叫做愛情，愛情唔係一刻，係成段人生。」Yoyo大讚好浪漫，但他笑言楊茜堯另有想法，「我老婆貪心啲，又要你咁諗，又要儀式感，slogan嚟，哈哈！」他更自爆去年跟太太結婚7周年，太太有要求，「佢好單刀直入『7年之癢喎，有咩搞作』，我相信處女座嘅女人，唔係要你付出啲乜嘢，睇到心思同埋着緊佢就夠。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
