方俊被屈呃晒張偉文積蓄：對得住天地良心斥資7位數出歌開Show中年追夢丨獨家

得到恩師張偉文鼓勵，監護人方俊月前推出首支單曲《鼓舞》，下月15日再舉行處男個唱，出歌、拍MV、做宣傳及開show自資近7位數(百萬)血汗錢。方俊坦言追夢唔容易但快樂，提到被唱黐住張偉文撈「油水」，甚至被指攞晒張偉文多年來做和音的積蓄，方俊不吐不快：「我有帳簿，清楚列明每項收支㗎，有懷疑嘅歡迎嚟查閱。」採訪：方騫平攝影：朱偉彥

方俊獲恩師及圈中友好鼓勵下追逐歌星夢。

方俊唱功唔錯。

方俊好愛唱歌。

張偉文仲客串拍MV。

方俊月前推出首支勵志單曲《鼓舞》。

相隔6年張偉文為愛徒新歌出山做和音。

方俊處男單曲《鼓舞》邀得Eddie(彭迪安)、陳思齊、奇哥拍MV。

方俊在第一屆《中國寧夏．平羅全國網絡歌手大賽》除打入4強外，並囊括「最佳人氣歌手獎」。

方俊仲喺網上節目《星星相識》中唱歌。

方俊於下月15日在北角新光戲院舉行《方俊燃亮愛演唱會》，處男演唱對他意義重大，因為部份門票將送贈視障人士及其家屬來「燃亮愛」，讓視障者都有機會感受及聽到音樂會，甚至安排上台發揮所長。當晚更有方麗盈、王美蘭及殿堂級天后助陣。

方俊於下月15日舉行《燃亮愛演唱會》。

方俊經常湊張偉文去飲茶。

王美蘭係表演嘉賓之一。

方俊跟姚煒、方麗盈、周啟生都好照顧張偉文。

斥百萬追夢唔肉赤

對於斥資近百萬追夢，方俊唔肉赤，亦覺得好值得：「唱歌係我興趣，係一生最愛嘅工作，為爭取曝光，唔介意做特約演員，雖然錢少啲，而且冇地位，但特約演員都係演員，我唔會踩自己嘅。」方俊笑言獲TVB讚表現好，「某日突然發信話加我一倍人工，可想而知我幾熱愛演出，所以由𠵱家開始，希望能成為終身事業。」另外，方俊強調開個唱並非為賺錢，只係對自己有個交代，「唔做怕將來會後悔，好似前輩仙杜拉咁，佢成日鼓勵我唱歌；張偉文就提點我係時候要獨立；姚煒教我做藝人應注意事項，無時無刻當前面有鏡頭。」

之前張偉文舉行3場《友情有義演唱會》請來姚煒做嘉賓。

師徒想合唱《離別的叮嚀》。

仙杜拉隨方俊到護老院探望張偉文。

為幫助歌唱事業，方俊唔介意淪為特約演員。

皮草生意結下人緣

方俊對錢銀睇得好開，原來背後有段小故事：「我喺公屋長大，小時候爸爸離家出走，媽媽獨力照顧我哋3兄弟，書簿費靠親人資助。」故此方俊13歲開始做童工，偷偷在工廠做包裝半工讀，中學畢業後做製衣配件，生意越做越大，就連國際品牌都指定搵佢合作，亦為他帶來第一桶金，21歲經已在荃灣置業成為小業主，之後又做埋當年盛行嘅皮草生意，賺到大錢又賺埋友情：「因為贊助藝人服裝，所以識到甄妮、張偉文、靜婷、呂珊、新加坡歌后麗莎等，甄妮及張偉文請我做佢哋個唱嘅表演嘉賓，尤其偉文仲指定要我做足8場，我呢個『黃毛小子』真係好感動呀。」可惜金融風暴哥哥投資失利，方俊倒欠哥哥2000萬：「但我冇埋怨一句，反正人出生就一無所有。後來轉做花店，用咗10年時間清晒條數，𠵱家冇債一身輕，已結束兩間花店業務，仲留到少少養老金及有能力照顧到張偉文終老。」

方俊中學畢業後經營製衣配件生意，賺到第一桶金。

做過皮草生意。

方俊為甄妮首次做個唱嘉賓。

七師傅指方俊住喺風水豪宅。

年輕時方俊跟肥姐合照，個樣有啲似張國榮。

少年方俊輪廓分明。

係靚仔一名。

方俊喺公屋長大，由方媽媽獨力照顧3個兒子。

Fans利是都有記錄

不過，出錢出力支持張偉文惹來閒話，深受委屈的方俊有話要說：「有人唔止一次喺朋友圈唱我呃晒張偉文啲錢，話偉文唱咗幾十年和音及出唱片，佢啲積蓄去晒邊？質疑有人黐埋身撈『油水』…」對於呢啲指控，方俊自問對得住天地良心，唔想食死貓，要公開交代帳目：「因為張偉文冇買保險，2016至2018年間兩次腰椎大手術已花光佢30萬積蓄，第3次手術費係我同佢啲忠粉夾錢，我有齊呢4年幾帳簿，入面清楚列明護老院舍租金、物理治療、私家醫生、藥物及保健品、雜項等，每月扣除政府發放嘅津貼，支出超過2萬元，帳簿透明度好高，連Fans畀嘅利是及開過3場小型個唱收入都記錄落嚟，如有疑問嘅話歡迎查核。」