電影屬奧斯卡金獎品牌A24最揼本之作。講述美國爆發史上最大規模的內戰，19個州份宣佈獨立，並組成反抗勢力，包括加州和德州組成的「西部力量」及「佛羅里達聯盟」等，與美國政府開戰。然後一班戰地記者冒死採訪，更要趕在反抗軍隊殺入白宮前，搶先抵達首都訪問總統紀錄真相。《美帝崩裂》屬公路電影，以戰地記者視角側寫戰爭，抱住戰爭片心態入場可能會有啲失望，但大量細節位值得反思，所有為份工搵命博的人都值得尊敬，包括戰地記者、消防員，及花蓮地震後倒塌的天王星大樓救貓的工程人員。 (剛上映)撰文:廖思慧
有觀眾嫌電影冇講解內戰的前因後果，抱住成頭問號睇戲，其實導演Alex Garland專登為始末留白，將重點放在戰爭過程中各種不人道的殘暴行為，期望令觀眾被一種未知的恐懼所包圍，營造出更震懾的心理驚慄。導演此舉非常成功，資深記者Lee (Kirsten Dunst飾)救新人記者Jessie (Cailee Spaeny飾)一幕非常震憾，反抗軍Jesse Plemons所講每一句都非常令人心寒，張力超強。
如身處戰場
導演形容電影是一部傳遞反戰理念的戰爭電影，但為免將電影拍得太過煽情或將戰爭拍得過度浪漫化，他採用自然的手法拍攝，減少戲劇效果，寫實呈現戰爭的殘酷，更採用特別的拍攝器材：「我們使用非常小型的手持攝影機。」電影的軍事顧問、前美軍海豹部隊成員Ray Mendoza大讚這種攝影方式「更具臨場真實感」，就像他在戰場上的視角一樣。
電影並非戰爭爽片，唔好期望由頭爆到尾，文戲頗多，但諷刺位好精彩，如記者去到一個平行時空一樣的太平小鎮，古著店售貨員唔理內戰，以為做「美豬」置身事外就冇事，但其實一樣被監控中。另外重點推介配樂，無論成條公路所有車炸晒，或路過難民營，甚至高角度拍攝屍坑，配樂都相當輕快開心，導演真係好黐線。尾聲近15分鐘反抗軍攻入白宮，坦克車在大街行走，槍林彈雨，不安感久久不散。
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
