上市公司大股東，在市道大旺時或大淡時，可以有乜「益自己」考慮呢？好簡單，市道旺時，股價炒到天咁高，若此時唔批股集資，咪蠢過隻豬？印股票當印銀紙喎（大家可有睇《金像獎》橫掃電影《金手指》？）點解唔做？

市淡時若股價跌到完全唔合理，遠遠低過所持資產價值（間中會是幕後操控，㩒到個股價低一低），咁就將公司私有化，也是個令自己發達的方法，點解唔做？

近期港股巿值低迷，交投淡靜，正是大股東可以用低價私有化的良好契機。所以自去年12月以來，已有8間公司提出或考慮私有化，今年首季已有5間公司完成私有化及退市。

主席羅嘉瑞密密增持

睇走勢必定陸續有來，故此我長期會觀察哪隻股有機會私有化，其中要不停睇實的，是大股東不停增持旗下公司股份。小弟半年前開始選中一隻作緊密追蹤，正是2006年以5.1元集資上市的冠君產業信託（2778）。

我習慣每日閱讀上市公司的增持紀錄，發覺過去一年多，冠君主席羅嘉瑞不斷增持，到本周初仍在進行中，其持股量於執筆之時已達69.95%。

1.6元購入5萬股

筆者決定考考自己眼光，在1.6元入5萬股同佢「玩」，反正有點撳地游水之感。點解？筆者留意到公司擁有兩項無敵資產，包括去年表現較遜色的花園道3號，主因甲級寫字樓租務下滑，但仍有八成樓面租出。

另一不停生金蛋的「金雞」，則為全港最旺的商場朗豪坊。雖然去年市道低迷，但朗豪坊租戶銷售額，竟可以大幅增加50.5%，遠高於全港市場平均水平，令商場租金收益逆市上升13.9%至7.4億元，而且商場出租率更達幾乎爆滿的99%。

此公司往績息率已超過10厘，的確有點誇張，而52周高位是3.4元，上周股價則接近52周低位，我分析過，跟羅嘉瑞入多少，進可攻退可守。更重要是推測佢不久之後會提出私有化，究竟中唔中？

資深傳媒人 曾智華

---

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

緊貼最新最快新聞資訊，請立即下載星島頭條App：https://bit.ly/3Q29Vow