恒指過去3周大旺，上周更曾逼近2萬點，高見19706點，即時出現兩個與我有關的現象：首先是「騙子曾智華」網頁不停彈出，擺明氹散戶落疊做水魚，提供「必賺」股票。

這情況年多前已非常洶湧地出現過一次，令小弟不勝其煩，因原來大部分人都不懂一眼睇穿騙徒手法，100個好奇者總有3、5個上當。再三聲明，網上盜用我頭像推介任何股票（尤其藍籌以外的，必定是行騙）的網頁，全部是假的，煩幫手報警。

另一方面就是不少老友視我為「投資名燈」，一見市升，立即紛紛問呢隻嗰隻，睇睇可否搭轉「升市順風車」。

短期最佳Timing已過

短期內最佳Timing已過，因股市由14000點升至16000點，再由16000點爆升上近2萬點，所有實力股已跟升兩至三成，此時追入相當不智，亦顯示絕少散戶領略股神名言：「別人恐懼我貪婪」。

纏住死咬不放的，我惟有畀例牌貼士：「睇嚟呢個升浪未完，上周中後期只是升得太急要消化一下，正常應該會衝破上次高位，即年多前的22000點」。

股市可以理性也可以不理性。理性的，是套用價值投資法選股，中長線必跑贏。切勿在2,000幾間上市公司中亂買，因大多是「垃圾股」，完全冇投資價值！只需瞄準幾隻本地老牌藍籌公用股，中長期冇得輸。

另外，也可以行「不理性」方法，只跟大戶手影。股市永遠是上上落落，惟有如此大戶才有肉食，可以食升（揸期權），也可以食跌（沽期權）。

佢哋要舞高弄低恒指，必須大手吸或沽成份股，當然冇可能100隻都揸或沽，故此只會短時間內影響7隻權重股，以達到操控恒指升降目標，包括滙控（005）、港交所（388）、騰訊（700）、建行（939）、中移動（941）、美團（3690）及阿里巴巴（9988）。只要一見佢哋手影即跟，多數有斬獲。

資深傳媒人 曾智華

---

由即日起至5月27日，參加《星島申訴王》「港人置業意向」問卷調查，即有機會贏走香港迪士尼樂園門票2張或SMARTECH智能煮食鍋！ https://bit.ly/3V7t3o7

緊貼最新最快新聞資訊，請立即下載星島頭條App：https://bit.ly/3Q29Vow