周國賢（Endy）和周家怡最近在ViuTV原創劇《無人之境》首度合作演夫妻，最初有擔心，但因兩人有太多相似位，好快就打破隔膜。雖然好啱嘴形，但家怡驚覺他們似性別對調，更踢爆拍錫錫戲時，著住孖煙囪的Endy竟要再加打底褲，令家怡搞笑大呻：「係咪驚我博你懵吖？！」。採訪：杜杜 攝影：譚志光 髮型:Vincent Yeung(家怡)、Eve Chiu(Endy) 化妝:Herman Ng(家怡)、Winki Tsang(Endy) 服裝: i.t(家怡)
Endy和家怡拍劇前並不認識，Endy形容「完全是兩個平衡時空」，最初有點擔心，家怡笑着追問他：「擔心我蝦你呀？」Endy否認：「我哋飾演呢對夫妻密度好高，感情要鑽到好深，擔心夠唔夠時間同對手咁短時間入到戲呢？！」但好快已令Endy放心，「第1次見面我幾緊張，但即日見佢比較豪邁少少嘅一面，有少少熱情，就放下心頭大石。」家怡笑言：「最初我啲nice係掩飾我緊張。」
夾到誦經方式一樣
兩人同在1979年出生屬羊，卻夾晒口供扮細個，Endy笑謂：「你03年，我91年嘛！」家怡說：「03年又太誇，啲人鬧呀！九運嘛！91年OK！」問到點睇對方為人？Endy未開口家怡已話：「唔好讚呀！」Endy扮唔理，「佢演技好外，亦好可愛、嬌俏，03年出世嘅人都係咁。」聽到讚美聲家怡笑指：「嘩！夠啦！飄起啦！」家怡發覺他們有太多相似地方，「佢無端端拎啲鼠尾草喺度燻。」Endy說：「我哋放飯，佢又拎罐辣椒醬出嚟！」家怡感到最神奇是連誦經習慣一樣，「唔係誦咁簡單（Endy：我哋係Rap！）真係好少有，我搵唔到呢行有人一樣咁癲，《地藏經》係十三品就咁讀都要個半鐘，但我哋可以背。」
家怡認同Endy啱嘴形，但性別卻對調，「佢係女嚟，我係仔嚟，佢好鬼麻煩！」家怡踢爆拍咀嘴戲時，Endy竟要着打底褲，「男人老狗，着孖煙囪點解要着打底褲呀！？」Endy解釋是舞台劇常用免露出個咪的「收咪褲」，家怡不理繼續講，「成日話係收咪褲，着咗落去明明條所謂收咪褲長過條孖煙囪，點會得㗎？！」Endy笑着再拆，「肉色，我有攝高㗎！」家怡越諗越不滿，「諗返轉頭，真係懷疑你係咪驚我博你懵吖？！搞到我好似好鹹濕咁！」Endy解釋，「我哋企喺梳化上面油牆，梳化會激情過喺床，仲要着住孖煙囪錫錫。」家怡投訴，「所以你就打底，攝個嘢驚我摸你係咪？！豈有此理！」Endy唔識回應，但家怡檢討可能問題出於自己太主動，「拍呢啲戲知男仔會避忌，怕好易畀人話鹹豬手，我要令對手放心，一定要好勁咁，嚟啦！哈哈！唔知係咪我落多咗兩錢肉緊，佢以為我會鹹豬手呢！？」Endy笑着否認，「我鍾意溫柔啲，你好粗暴呀！」家怡笑說：「我下次試吓溫柔啲，over act少少，sorry！諗住令到你舒適啲。」
認同坦白對另一半
講完親密戲，家怡擔心觀眾理解錯戲種，故事其實講一般結婚10多年夫妻遇到的問題，跟訪問氣氛完全相反，感覺較沉重，而其中一場衝突戲令他們最難忘，「好誇，有10幾頁紙對白，我哋唔係舞台劇，劇集、電影未試過咁多頁紙，仲要得兩個人，拍足一晚好攰，心力交瘁，條氣好似開咗刀破咗咁，喊到對眼睜唔大。」Endy感激拍完這場戲後，單拖再拍自白場口時，家怡陪伴在則，「佢其實走得但係冇走，一路喺度陪我，我演緊時聽到佢都有情緒，淨係喺度索吓鼻已經好幫到。」
劇中Endy飾演的小男人，因八掛利用航拍機意外發現鄰居以及家怡飾演的老婆秘密。問到跟另一半相處，是否如角色收埋秘密？單身逾10年的家怡就笑謂，「嘩！long long time ago，等我諗吓先！如果我當初係咁就醒，我就係乜都講好蝕底，其實係搵咗錯的人，如果啱嘅人應該乜都可以講。」Endy認同，「細個時乜都唔講，或者有嘢想講又唔敢講，因為驚佢嬲，其實坦蕩蕩會好啲，但係有技巧。」家怡忍不住取笑他，「話驚佢嬲嗰吓，好似啲女仔。」Endy即扮嬌嗲，「咩啫！係唔講仲嬲嘛！對唔住囉，家怡姐！」原來家怡試過坦白未必從寬的傷心經歷，「我以前好低能嘛，話以前拍拖嚟過呢度，講完後依家呢個又記咗喺心，我講嗰句係冇咩意思，但佢聽完都會唔開心，其實我係咪唔係好ready？！唔關人哋事係自己問題。」
