香港政府年金初期推出時，不少人以陰謀論觀之，加上市場上私人機構也有年金賣，存在競爭，當然有人創作這樣那樣的不利攻擊。
結果當然仍是「長途佢贏晒」，因政府年金擺明是保障60歲以上長者安全理財作出發，不但斗零唔賺，更保證月月「出糧」至天長地久。當然有急需可以贖回（但絕不可隨便，否則有違原意！），未派完有剩也會安排指定受益人取回餘額。
年金賣大包反應熱烈
小弟已買了5年多，對其運作非常滿意。最近見到年金公司突然「賣大包」（吸引草根階層保住老本？），推出一次過優惠，若購買30萬新保費金額，即可終身獲取額外津貼，咁筍我當然飛身再買。
大家人同此心，結果出現人龍，我輪咗2個月才獲接見，負責的年金顧問笑笑口：「曾先生好彩你約得早，如今排到10月喇，你早咗買着數咗啦。」
點解着數？因早兩個月就賺多近千元！條數點計？首先，我一筆過付30萬港元，以年齡70歲計，每月基本派1968元，我的本金，是可派13年5個月。
意即到時供的本金已派光，而我是83歲，若屆時未離世就發達啦，政府會繼續每月過戶1968元，直至小弟百年歸老。
身邊個個老友不時講笑：「碌Sir，你成個樂觀大快活款，睇狀態，分分鐘有機會活到100歲做人瑞噃。」
如果真係去到100歲才上天堂，即政府會加送16年7個月1968元畀我，等於391632元，接近40萬啊，哈哈！
未夠未夠，在這個超筍推廣計劃，政府另外再每月加「送」492元。
長命百歲額外賺57萬
真真發達！若小弟真變「百歲人魔」，如此，這個30萬元年金推廣計劃，就會令我再多賺30年每月492元「現金贈送」，總數就是360個月乘492元，即177120元。
再計計，參加了這個30萬元推廣，若真的活到100歲，等於政府送幾多錢畀我？係568752元！買30萬推廣年金，活到100歲，可額外賺近57萬元，諗下都開心死。
再次聲明，我並非香港年金甚麼代言人，一個仙冇收，只係真心覺得筍啫！
資深傳媒人 曾智華
