本港樓價貴，上車置業不容易，不少人寧願租屋。不過，即使租屋也非一帆風順，最近有租客大呻，自己租了一間150方呎套房，而上手租客是「煙剷」，入住了一段時間後，發然房內的煙味仍然消散不去，相信上手留下來的煙味已經滲入牆壁及冷氣機。在入住2星期後，身體出現各種毛病，例如流鼻水、喉嚨痛等， 「若情況繼續，寧願俾人收按金都會照搬，健康緊要」。代理指，如果煙味情況這麼嚴重，在睇樓時理應察覺得到，相信此情況不構成退租理由，並呼籲租客可分不同時段上門睇樓，了解盤真實狀況。
裝空氣清新機仍無改善
該租客以「前租客係煙剷」為題，在連登討論區分享，近日租了150方呎套房，前租戶是煙鏟，入住前有明顯的味道，當時他只以為是舊屋的一陣嗡味，並打算租後打開窗戶，待空氣流通幾天就問題不大。
不過，房內充斥煙味的情況沒有改善，他指「住咗2個星期我一直有鼻涕鼻塞，間唔中瞓醒後喉嚨痛及想咳，唔知係我開冷氣瞓覺，鼻敏感定關前租戶係煙鏟事。」在貼文中，他指試過數種方法，例如自行清洗冷氣機及窗簾，使用空氣清新機等，而他將相關情況向業主通報，業主亦有重新油牆，但他的身體狀況依然沒有改善，並尋求網民意見。
網民：搵專業人士洗冷氣
網民回應，「一定要搵師傅洗（冷氣機），自己點抹都唔會抹得乾淨」； 「怪自己起租時急，有味都租」；「話退就退咁份約要黎做乜」。
該租客補充，「睇樓時唔肯定係咪煙味，Neway嗰種一入去就係煙味，佢又唔似，我以為舊樓同冇開窗嘅嗡味」。他指，「若情況繼續，寧願俾人收按金都會照搬，健康緊要」。
代理：分不同時段睇樓 了解真實狀況
就此個案，本報向美聯物業荃灣區代理鍾家豪（Victor）查詢，他表示以他所知，此情況不能構成退租理由。「除非單位內部結構有問題，例如爆水喉、斷水、斷電，或者屋企有損壞，而業主又整唔到，就可以係退租理由。」
他表示，根據該名租客網民的說法，屋內煙味應該非常厲害，照道理睇樓時應該很容易察覺得到。「睇樓唔會一、兩分鐘就出嚟，如果睇樓前發現到呢個問題，可以向業主提出，清理唔到可以唔租，但唔可以租咗就話因為煙味而退租。」
如果要提早退約，要看看雙方的合約條款，一般而言，在仍是死約階段退租屬於違約，「差幾耐死約就賠幾耐死約，例如簽咗一年死約，住咗一個月，就賠剩下11個月租。」不過，以今次的個案，網民與業主的合約訂明，相信如退租只要沒收按金，不需賠剩餘月份的租金。
Victor建議，租客為了保障自己，不妨在決定簽租約前，約業主分不同時段睇樓，多睇幾次以了解租盤真實狀況，「例如夜晚8、9點，上去聽吓隔離鄰居會唔會好嘈。」不過，他補充，「當然而家租盤短缺，業主都未必容許你上去睇咁多次樓。」
8大睇樓注意
除了分不同時段睇樓外，其實租樓和買樓一樣都要睇樓和驗樓，千萬不要單憑相片就「扑鎚」。睇樓時要好好視察環境，看有沒有潮濕、窗身滲水、甩灰等等，有問題都可以即時向業主或代理提出。以下為主要睇樓注意的要點：
1. 水
所有水龍頭或者廁所冲廁都要檢查來去水，因為舊樓的水喉管常有老化、淤塞、漏水等問題，要維修的話非常昂貴
2. 電
確保每個電源開關掣都能運作，並檢查插座都有電源
3. 煤氣爐
檢查爐頭可否正常運作
4. 窗
確保窗戶開關沒有生鏽等問題，並最好於落雨天睇樓檢查漏水情況，如單位有驗窗令就則記緊向管理處查詢
5. 天花、冷氣、木地板、牆身
屬漏水高危位置，留意附近有無漏水發霉痕跡
6. 網絡
留意有沒有上網線，不少村屋仍未有光纖入屋
7. 木門、木櫃
留意門框附近有沒有木屑，白蟻、螞蟻的窩一般會躲在裡面
8. 屋外環境
檢查走廊、後樓梯及鄰居門口等，可以反映住戶生活質素之餘，又可確保居住環境清潔
相關新聞：
年輕人講品味 租樓也豪花六位數裝修「住一年就被業主趕走點算？」新手租客8大注意事項
