7月10日，部份時間有陽光，有幾陣驟雨，日間酷熱。局部地區有雷暴。美國聯儲局主席鮑爺（鮑威爾）喺國會參議院，就半年度貨幣政策報告作證，表示最近嘅經濟數據顯示控制物價放緩取得進展，當局需要更多數據支持通脹正朝向2%目標嘅信心。佢同時表示通脹雖仍高於2%目標，但高通脹並非唯一威脅經濟風險，減息力度過細或太遲皆可能對經濟和就業市場構成風險，相反，太早或過度減息恐令通脹放緩勢頭停滯甚至逆轉。鮑爺表示雖然未能排除加息可能，惟下一步政策行動係較大機會減息，而近期數據顯示就業市場冷卻，相信似係完全恢復平衡。鮑爺嘅講法似係暗示今個月底議息仍未有機會減息，但市場押注聯儲局於9月減息機會超過七成，並估計今年或減息兩次，每次減0.25厘。
標指納指再創收市新高
鮑爺放鴿，美股個別發展，道指反覆，收市跌52點或0.13%；不過標指跟納指再破頂，標指升4點或0.07%；納指升25點或0.14%，雙雙再創收市新高。重磅科技股繼續做好，Nvidia股價收市升2.5%，英特爾再升1.8%，為升幅最大道指成份股。蘋果升0.4%，報228.68美元創新高。Tesla升3.7%，過去一個月累計，股價反彈逾53%。美債孳息續升，10年期債息最多升6.2個基點，高見4.328厘；息口敏感嘅2年期債息升3.6個基點，見4.654厘。美滙指數最多漲0.2%，報105.208。
摩根士丹利策略員Michael Wilson接受彭博電視訪問時表示，隨着美國大選、企業業績及聯儲局政策不確定性加劇，應為美股回調做好準備。佢表示由目前到11月美國大選期間，美股隨時出現10%回調嘅機會甚大，美股第三季料表現動盪。不過，他唔太擔心大市調整，反而係吸納好機會，建議吸納高質素增長股，以及優質股，包括大型股、資產負債表良好企業，以及能夠實現盈利嘅企業。高盛環球市場董事總經理Scott Rubner更估計，若企業業績不及預期，資金將撤出股市，股市8月可能經歷兩周大震盪。
仍要靠重磅科技股帶動
至於反映中概股表現嘅金龍指數升逾2%，帶動夜期及ADR回升，今早黑期市升百點，回升至17600水平，預期恒指高開。昨日A股觸底反彈，今日能否有接續力量繼續反彈，如A股續彈港股應可跟隨，上證指數回試2970至3000區域，恒指則上試17700至18000關。港股有否足夠彈力，需要靠重磅科技股帶動，如恒科指能突破20日線(3665)，恒指同樣挑戰20日線(17953)。不過今日即料於5日線(17770)及10日線(17822)遇阻力，短線支持為17500。
古天后
