《造星V》出身的鄧家杰（Kakit）即使冇簽約ViuTV，但過去一年在演藝圈發展不錯，拍過微電影和MV演出，下月即將參演風車草劇團的黑心喜劇《Di-Dar音樂劇場》。最近他跟FHProductionHK熊仔頭成員之一Sona （劉曉穎）一拍即合，兩人更推出合唱情歌《誰的錯》。新歌由曾為姜濤《濤》寫歌的Oscar Tong 加Chris tam作曲；孔德朗填詞。歌曲描述每段關係的結束，未必都是無疾而終，但絕對都是無可奈何。
Kakit跟Sona惺惺相惜，Sona係香港網紅及日系地下偶像團體Ace mode 成員，擁有唔少粉絲，最近熊仔頭平台為Sona拍攝了一條名為短片，揭露作為地下偶像歌手只有月薪$1000，更爆出她賣$70一張簽名相，而Sona經理人孔德朗甚至大爆Sona為了維持生活，曾化身經理人「Sera」向客戶硬銷自己，爭取接job機會。雖然條路難行，但熱愛唱歌，唔會放棄。今次公司投放資源為她推出第3首歌曲，亦她首次挑戰合唱歌。
拍攝MV當日，Sona和KaKit 在導演和熊仔頭的指導下奉旨親熱，甜蜜互動，熊仔頭要求兩人有情侶激情一夜後的感覺，故做出貼面擁抱，甚至床戲，Sona要壓在Kakit身上，動作露⻣。Sona猛話要壓在男方身上好尷尬，KaKit反而能淡定應付，笑言：「我反而第一時間諗，大家都唔應該着住件衫喎，尤其男仔同另一半喺屋企最舒服嘅狀態，多數唔會着衫！」
講到難忘事，就係甜蜜過後拍嗌交戲。為了效果，Kakit大鬧Sona令對方爆喊 ，她說：「自己不太會罵人，當時我都唔太知KaKit鬧緊乜，只係我好怕大聲講嘢嘅人，所以佢對住我呼喝就忍唔住喊，成就真情流露嘅畫面。」而Kakit就發現自己鬧人的才能:「原來我鬧人都幾叻，仲要係撕心裂肺嗰種，當時九唔搭八亂罵一通，點知可能用力過度，鬧到第二日發燒，我都係第一次發生咁嘅事。」
另外，Kakit早在《造星V》面試時候直言唱歌是自己弱項，入行後KaKit 積極跟老師學唱歌，感恩自己能夠有這次合唱機會，他自爆原來入行前曾send履歷去casting熊仔頭影片作品，但不成功：「當年眼見《我在黑社會的日子》搵黑社會角色，當時我讀緊中5，特登去買咗件黑色背心，然後手上黐咗個紋身貼紙自拍，再揸住支棍自拍應徵，最後冇下文。」
