商業世界有個不明文的策略，就是凡換管理層時，新上場的必定公布公司現況差到無可再差，將一切負面嘢全部歸咎上一手，撇清關係以便重新開始，更重要是，所有衰嘢唔關我事。講完就可輕裝上陣，重新來過。
英工黨上台即唱衰保守黨
其實不止商業世界，政治世界也一樣如此。上月英國新政府入主唐寧街十號後，第一件要做的事就是唱衰上任政府，其中之一是指其搞到財政千瘡百孔。
英國新財相李韻晴（Rachel Reeves）直指英國窮到燶，好唔掂，財赤達220億英鎊。點解衰成咁？當然「踩」到前財相侯俊偉（Jeremy Hunt）「扁」，指佢一直靠給予國民虛假希望以維持聲譽，胡亂承諾大幅改善公共交通及醫療福利，實質永遠不可能做到。
李韻晴將情況形容到極端壞透，策略當然是向英國人講：「衰成咁，唔關工黨事，一切皆因保守黨亂嚟，最衰係佢哋！」
更重要的是為10月自己提交的《財政預算案》作部署，先俾心理準備大家，尤其敵對議員：「嗱，正因你哋搞出個爛攤子，故此，我哋才冇法唔做艱難決定，推出一套不可談判的『財政原則』，當中包括大幅削減公共開支。至於改善道路、興建鐵路及重建醫院，全部冇錢要叫停外，更會減低高收入者的福利，例如暖氣津貼。」
英國不是美國，後者可以亂印銀紙，英國財政真的要量入為出。李韻晴做足「唱衰」前任後，自己份功課又如何呢？10月底必須「見家翁」了。
恒隆交棒或內有乾坤
講到換掌權人的部署，上周本欄標題為《交「棒」變交「火棒」》，講述恒隆集團的交棒現象。
商界高人讀後話；「碌Sir，其實恒隆進行的，也可能是趁換權力層時換埋管治策略。減派息原因可以有明有暗，例如靜靜將派息的錢還貸，減低在這段時期捱高息，也許是明智策略。另外，如今內地房地產大出血，手上留多點現金掃平貨，對集團也長遠有利。故此外面見到的是恒隆集團公布業績，減派息後股價大跌，盈利也麻麻。但是究竟陳啟宗父子諗乜，好難參透！」
資深傳媒人 曾智華
相關文章：
