《全民造星III》冠軍「折骨」Ben（趙祥誠）離開舊公司後沉寂一時，最近終有新搞作參加《第二屆Red Bull Dance your Style跳舞比賽》，望透過比賽令更多人認識折骨舞。為備戰他笑指連食飯沖涼都周身郁，更自爆沖涼時拉筋和度橋最有效。計劃年底出自創歌轉做獨立歌手的他，訪問獲家姐和參加《聲夢傳奇2》妹妹Maggie（趙頌宜）撐場，他透露一家人都愛唱歌，他自小靠陪媽咪唱粵曲培養唱歌興趣。採訪：杜杜 攝影：譚志光 場地:Boogie Renaissance Studio
Ben解釋雖已出道，但對跳舞熱情不減，決定今次再參賽，「好多人或者屋企人會同我講，你跳舞咁激烈好易受傷，但我覺得趁仲後生試多啲，加上呢個比賽着重表演性，係我專長，唔係純粹Battle對戰，仲有同觀眾互動，做啲好炸嘅招，睇到其他國家開始搞時已好想參加，但之前撞咗其他嘢，今次終於參加到。」他坦認參賽仍有壓力，「最大挑戰可能有啲人都睇過折骨或者跳舞，都要做到新嘅方式畀大家睇。」他想勝出代表香港去印度再戰，「由細到大都好想代表香港去做啲嘢，特別今年睇到奧運跳舞都係運動，亞洲嚟講跳折骨嘅人唔算多，希望可以帶到多啲呢種表演方式畀佢哋睇。」
到學校教學生跳舞
參賽前Ben做了不少準備，除聽多些不同類型歌曲，無時無刻練舞亦不少得，「一有時間就會跳，甚至食飯、沖涼都會周身郁。」食飯周身郁媽咪唔鬧？他笑言：「佢可能睇慣咗，已經唔會講啲乜嘢。」他又解釋比起練習，反而花更多時間度橋，「到時要即興，DJ打歌係唔同style，要諗點樣應付，反而要諗更多嘢。」而他認為沖涼時構思效果特別好，「唔知點解沖涼對於我係個好大嘅啟發點，之前《造星III》有round做恐怖片，我都係沖涼時諗出嚟，可能好靜畀我去諗嘢、放鬆，同埋沖涼時拉筋會有效啲，哈哈！係自己習慣。」
去年約滿寰亞後，Ben花了很多時間到學校分享及教小朋友跳舞，他很享受這種傳承的工作，「可能只係1、2次workshop，但好開心分享自己識嘅嘢，又可以等啲學生去嘗試吓。」提到《全民造星V》的鄧家杰受他影響愛上折骨舞，他覺得這件事很神奇，「𠵱家都唔係好接受到，人哋會因為我而改變，好不可思議，我成日覺得自己表演冇乜意義，呢2、3年好多人同我講，令我有好大轉變，開始相信自己做嘅嘢，我可能就係呢個角色，做一啲人哋唔做嘅嘢，亦影響到我參加呢個比賽。」這些鼓勵說話，除了屋企人講，還有一班《造星III》的戰友，「旨呈佢哋同我比較近，會close啲，對我鼓勵好大。」
增自信做獨立歌手
自信大增，亦令Ben夠膽向獨立歌手發展，更嘗試創作歌曲，「儲埋都有8到10首demo，之後會出。」他認為獨立歌手形式更適合他，「好似跳舞咁，我好多嘢都係free style，適合多啲自己設計，唔知啲歌大家鍾唔鍾意聽，但對我嘅創作都有少少信心，希望完成到1個專輯或者一啲作品，心願係畀自己諗法大家睇。」他透露創作曲風比較另類，「可能我有啲反叛，想做啲暫時好少人做嘅嘢，或者貼近啲國際或歐美巿場嘅曲風，好似我跳折骨舞咁，當時冇人睇過，冇出現過我就好想去做。」他已有時間表重返樂壇，「有1、2首歌差不多做好，差少少就可以推出，希望今年內會得。」
訪問當日，Ben由有「城巿畫家」之稱的家姐Elaine（趙綺婷）和妹妹Maggie陪同到場，他大讚已做回他經理人的胞姐能幹，「佢都好勁，有自己工作，畫畫上面嘢，同時會兼顧屋企大大小小嘅嘢，顧掂自己外，仲顧埋我啲嘢。」而出任小助手的妹妹，他就讚她參加《傳奇2》後令她刮目相看，「佢性格好似我，比較內向，一開始比較擔心佢呢個性格，好似人哋擔心我一樣，但呢個擔心係多餘，原來上到台會有驚喜，佢把聲喺女仔入面算係低音，可以咁有特色，最近仲扮嘢，佢原來可以做到咁多嘢，收收埋埋好多技能，我係十分支持佢，佢每round比賽都有問我，大家交流比賽心得，佢嘅進步真係好大。」
Ben有計劃跟妹妹合作，「有諗過現場表演，我可以幫佢伴舞。」他們亦想過合唱，甚至MV都拍埋，但覺得未夠靚，「淨係喺屋企拍，都係拍好啲先，我哋不斷喺屋企練歌，幫對方和音，我哋把聲襯到都幾好玩。 」原來他一家人一向都愛唱歌，「可能畀媽咪影響，媽咪鍾意唱粵曲。」他更負責陪媽咪唱，「我會唱任劍輝，背就背唔到，如果有得跟住歌詞都可以唱晒成首。」有聚會時，他還負責跳舞助興，「本來我唔會，但係我媽咪會叫我跳吓，個氣氛就會開心啲。」新年時幾兄弟姐妹還會有特別賀年節目，「我哋新年會整啲賀年歌拍畀媽咪睇。」
