巴黎殘奧在香港時間周四凌晨舉行開幕禮，輪椅羽毛球代表陳浩源及乒乓球女將王婷莛出任持旗手。陳浩源事後在社交媒體發文，表示今次擔任持旗手的經歷非常重要，自己更加激動得有幾晚痛哭，感懷身世。
陳浩源及王婷莛今次出任巴黎殘奧香港持旗手現身開幕禮，這位港將事後在社交媒體發文分享心聲：「呢幅將係我人生入面其中一幅最珍貴嘅相。我想喺度講吓，成為持旗手對我嚟講有幾咁重要，亦令我有幾興奮。可能大家唔知，當我知道咗我成為持旗手嘅時候，有幾個晚上我都喊咗出嚟。可能係為自己驕傲，亦可能係感懷身世。」
「我出生喺屋邨，名正言順一個香港嘅屋邨仔。細個家境並唔富裕，到咗大個遇上一場交通意外，成為咗一個殘疾人士，我冇諗過自己會點樣成功，人生亦好冇自信，但係遇上運動，令我人生有180度改變。」
陳浩源表示，可能好多人會用錢，或者經濟角度去衡量運動，但係運動帶來的得著，偏偏係錢買唔到：「由一個出身底層嘅屋邨仔，殘疾人士，到成為殘奧獎牌運動員，今屆更加成為持旗手。遇上運動，不單令我身心靈健康，更另外有一個不一樣嘅人生，呢個就係運動嘅魔力。」
隨着持旗手在開幕禮帶領中國香港隊進場，正式宣佈香港23位殘奧運動員今屆嘅賽事正式展開。陳浩源希望外界大力支持港將：「不單止留意我哋嘅賽事，更可以留意我哋嘅故事，希望無論場內定係場外，我哋都可以感動你，證明大家知道我哋係值得被支持，值得被尊重。」
港隊首日賽程
8月29日(周四)
項目 級別 選手 時間
游泳 女子S14級100米蝶泳初賽 陳睿琳 下午4時35分
硬地滾球 女子混合BC4級分組賽 張沅 晚上6時50分起
硬地滾球 男子混合BC3級分組賽 謝德樺 晚上8時起
硬地滾球 男子混合BC4級分組賽 梁育榮 晚上11時起
羽毛球 男子單打短肢組SH6級 朱文佳 凌晨0時起
游泳 女子S14級100米蝶泳決賽(如晉級) 陳睿琳 凌晨0時42分起
硬地滾球 女子混合BC3級分組賽 何宛淇 凌晨2時30分起
(賽程以大會最後公布為準)
https://olympics.com/en/paris-2024/paralympic-games/schedule/29-august
