56歲「玉女掌門人」周慧敏(阿V)展開《地老天荒愛一場世界巡迴演唱會》，巡演首站昨晚於澳門倫敦人揭幕，但始料不到她竟趁巡演跟世界各地跟歌迷告別，宣佈今次巡演後，決定不再做大型巡迴演唱會！令不少歌迷不捨大哭。
當晚阿V狀態大勇一共換上5套服裝登場，令觀眾驚嘆她係「不老女神」。演唱會以《自作多情》及一連串快歌作揭幕，她又唱又跳帶出氣氛。阿V開腔跟歌迷打招呼說，「我對今次巡演真係充滿期待，內心喜悅要大爆發， 我好Ready 啦 ，你哋 Warm Up 未？啱啱啲快歌，好似帶返我返90年代，諗返我第一次個唱《94美的化身演唱會》，個陣自己跳舞似機械人，有邊個睇過？」觀眾歡呼四起，她續說：「唔經唔覺你哋就跟咗我30年！我見有80後，90後喎，仲有2000後小朋友，歡迎晒你哋一家人嚟睇我個騷 ，呢30年我人生充滿意想唔到嘅事，真係冇諗過自己仲企喺舞台度。快歌之後，呢個騷第一首慢歌《台下女主角》，我要送畀我人生第一位支持者，我天上嘅媽媽！」
分享人生觀轉捩點
是次演唱會，阿V由成長開始跟大家分享她的人生感悟，每段講話都讓歌迷很感動，第三部份，她唱完一曲《肋骨》後分享說: 「2009年，我成為咗人妻， 同年因為信仰，我多咗個天父爸爸。呢年係我人生轉捩點，我將自己一套普世價值嘅生存之道放低，一步步拆毀自己嘅強悍，將個『我』字縮細，發覺好多嘢都唔同咗，特別我哋做藝人，好多時人哋將我哋放到好大，我覺得唔係一件好事，放低『我』字反而睇到自己好多不足，執著放低，誠實面對自己，我學識接受自己有好糟糕嘅時侯，有好軟弱時侯，順服於我所有景遇之中，我開始發現，一直係我頭上面嗰個光環，冇能力再綑綁我啦！我喺裏面被釋放出嚟，得到真正嘅自由，所以我唔係女神，不過係一粒好細嘅鹽，有時會發下光嘅阿V，好嗎？」觀眾即以雷動掌聲回應。
生命中有好多天使
Vivian又反問歌迷，「你哋生命中有冇遇過天使？」歌迷大叫，「有呀，你呀！」她笑道：「我焗你哋講㗎！哈哈，我生命中有好多天使，剛剛唱完嘅《如果你知我苦哀》係哥哥（Leslie）寫畀我，佢都係我一個肩上天使，扶持過我嘅前輩，我永遠感激佢。你哋（歌迷）都係我天使，無論高低，多謝你哋都守護我。」然後她便請出演唱會特別嘉賓黃劍文，「以下呢一位朋友，我哋都係互相守護，係同行者，歡迎黃劍文加入我演出。」兩人隨即合唱了《流言》及《情未了》、《知己》三首歌。
到演唱會最後一部分時，Vivian除了跳唱不少經典歌曲，更第一次於台上演奏《貝多芬月光奏嗚曲：第一樂章》，她說：「其實我喺2022年聖誕節，錄咗第一首鋼琴演奏曲，我好開心，今晚我想彈《貝多芬月光奏嗚曲：第一樂章》畀大家聽，我彈琴唔叻，如果冇自己舞台，好難有機會公開演奏，所以我唔理啦，我要好好彈一次！因為我相信每一件事用心用愛去做，就有感動人嘅能力。」觀眾即掌聲不斷，並大叫「好感動呀」，「多謝你呀」，「愛你」等。
專注身體家庭貓仔
Vivian在嗚謝環節，殺歌迷一個措手不及，令現場不少人落淚，反而台上的她就強忍淚水，「其實今次巡演同自己講，搵最純粹心表演，為愛我嘅人唱歌，人生去到唔同階段，追求需要都係會有好大改變。今次呢個巡演，的確係每一場都係倒數時間。今次應該係我最後一次個人大型演唱會啦！」歌迷聞言忍不住落淚，有不少人大叫：「唔好呀！唔得呀！」她續說：「因為我覺得時侯差唔多啦，要專注自己照顧自己身體，照顧我家庭，貓仔都唔細啦‥‥‥我想多啲時間陪貓仔，同先生希望有更多共處時間，你哋應該理解係咪？」歌迷繼續大叫：「唔可以！」她安慰道：「我係唔會唔工作。只係想有多啲時間調節自己。時間好快，錯過咗就錯過咗啦，好似今晚咁，好快就過，已經演唱會尾聲啦，要唱最後一首歌，我好想聽到大家，大大聲一齊唱《最愛》。」演唱會結束，觀眾不停叫「安歌」，Vivian再出場，連續跟觀眾一起大合唱了近6首歌，最後呼應演唱會名字，以《天荒愛未老》一曲真正作結。
