《星島頭條》獨家披露55歲「中二生軟飯王」鄭梓浩（Brian）係終極賤男，使前女友Grace錢使足7年，同時搭上內地「小三」，及被孫耀威人母妹妹孫美賢(DaDa)包養。作為「中年好聲音」評判的肥媽一聽到鄭梓浩個名就勁嬲，大聲讉責對方賤男行為，更皺晒眉說：「你估你真係會轉彎呀！」肥媽對於Brian笑DaDa似阿婆搞佢「唔起」，剛通完「波仔」的肥媽即發火，「咁仆街嘅男人都有嘅？」更力撐DaDa又靚又高貴。採訪：方騫平
鄭梓浩一腳踏3船偷食風波轟動全城，肥媽覺得TVB應該將「真人真事」拍成劇集，她越講越激動：「我要訪問呢個阿浩點解咁犀利？有咁多女人畀錢佢使，佢係咪咁勁呀？又唔係小鮮肉，可能有人鍾意食老叉燒...」一臉疑惑嘅肥媽再說：「我做人咁有經驗，真係睇唔出，諗唔到會咁…」尤其狠批鄭梓浩零吸引：「佢唔係我杯茶，我需要嘅高度、需要嘅男人氣概，佢畀唔到。」肥媽覺得已故第二任老公Rick高大有型又有風度，強調冇男人信得過。
聞裸聊玩法狂鬧核突
肥媽堅持真愛係唔應該講金，即使追夢也不是要錢理由：「多餘啦，TVB有衫借，係佢嫌人哋啲衫啫。」肥媽又講出重點來：「其實兩公婆一齊食一齊住，邊個賺多邊個賺少啲唔緊要，但食佢住佢，仲朝三暮四，我養你；你養第二個梗係唔得啦，你估你真係識轉彎呀！我就未試過、未見過囉！」提到鄭梓浩試過跟「小四」DaDa祼聊；唔知咩係祼聊嘅肥媽聽完解釋即耍手擰頭，猛話咁核突：「我古老唔得呀，頂唔順呢啲玩法，哎呀，我驚第日見到佢會行開呀！」另外，鄭梓浩為求得到Grace原諒，「食完唱」話自己身不由己，更指DaDa唔男唔女，似阿婆搞佢「唔起」，肥媽聽到發火鬧爆：「吓？咁仆街男人都有嘅，你都黐線㗎，搞佢唔起佢又上房？」肥媽表示聽到都㷫，又指男人靠得住豬乸都會上樹，更戥DaDa好慘，「人哋畀埋錢租屋仲話人哋醜樣，DaDa個樣好靚又高貴，咩阿婆呀？」不過，她明白女人鍾意俾人𠱁，冇人用槍指住你，自願嘅，自作孽不可活。對於討論區洗版留言「中年好淫亂」，肥媽大平反說：「啋！《中年好聲音》夾埋有幾千個參加者得幾個賤啫，樹大有枯枝；族大有乞兒，一個族冇壞人點算係族群？」
討厭亡夫老友急攝位
「登七」的肥媽直認有經濟能力，有條件做Sugar Mommy包養「小鮮肉」，但佢冇諗過，「你都Short嘅，你肯我都唔制啦，其實我仲有好多人追只係我唔肯，有啲係亡夫朋友，佢一知道我老公走咗就問我『得唔得閒？』我話『No』，仲試過避佢避到入廁所半個鐘，出返嚟佢都未肯走咪我走囉，我覺得好核突，完全唔啱數。」肥媽強調幾十歲人唔需要性事，但以前就聽班師奶教煲鹿尾巴、鹿筋、人參湯畀老公飲：「飲完獲讚話『老婆幫到手喎』哈…坦白講，我都有份享用過㗎。」𠵱家肥媽最重要有朋友及家人陪伴：「唔得閒理啲麻甩佬，中秋節跟兒孫夾期已經想死。」
理直氣壯鬧伍sir冷血
另外，肥媽和伍仲衡就「派燈」做法曾在評判席上針鋒相對，肥媽自認有良心，唔介意變「長明燈」，反鬧伍仲衡：「人要面樹要皮，都畀人喺黑房走出嚟亮下相吖？得個剪影！人哋喺幾千人入到100名，都唔畀人拎住一盞燈走咁陰功？咁冇良心？而且5位評判，拎住一盞燈唔會影響到賽果，做人有時要有啲大度，唔係做老師就大晒。」肥媽理直氣壯表示在節目中鬧伍仲衡冷血，「70歲人仲使乜掩飾？對事不對人，做出就要負責任唔怕俾人話，你估好似嗰隻嘢(鄭梓浩)咁不負責任呀。」剛通完「波仔」的肥媽手術前未驚過，「有乜好驚呀？個天好公平嘅，閻王要你三更死誰敢留你到五更？我個人咁好一定冇事？唯一衰格係一日食到黑，最愛食燒鴨、燒鵝皮，之後要食少啲。」
