一對港產大熊貓龍鳳胎話咁快已經兩個幾月大，一眾「契爺契媽」日日捕住海洋公園社交平台，想一睹兩隻小可愛嘅近況，仲連奶爸奶媽都唔「放過」，話要睇多啲一對龍鳳胎同佢哋嘅互動。園方今日（4日）就順應民意，上載咗一條飼養員餵奶片段，主角係「細佬」！
片段所見，奶媽相當細心，餵之前將少許奶汁滴喺手上面檢討溫度，奶咀未送到細佬嘴之前，佢都仍然手舞足蹈，似乎想逃離奶媽嘅「魔爪」去玩。不過當奶咀送到細佬嘴邊嘅時候，態度180度轉變，立即依偎喺奶媽懷裏，郁都唔郁乖乖飲奶，園方搞笑咁話「有奶飲就開勿擾Mode」。
網民紛紛留言，大讚「萌到爆錶」，亦有人驚訝「大隻咗好多」，希望兩隻「小」熊貓「飲多啲奶，快高長大」。
細佬坐唔定。
奶媽好細心先檢查奶嘅溫度。
奶咀一擺到嘴邊細佬就郁都唔郁。
園方笑稱開咗「勿擾mode」。
餵奶片主角係細佬。
相關新聞：大熊貓︱咁多隻究竟點分？海洋公園教「熊貓辨認大法」兩個身體部位一睇就分到
大熊貓︱龍鳳胎溫馨時刻「頭貼頭」 安安可可歡度萬聖節 對南瓜態度大不同？
