迪馬利亞表現對辦。AP

世界盃開鑼戰，東道主卡塔爾輸畀厄瓜多爾零比二，成為歷來第一支主辦國球隊喺第一戰輸波。表現四個字形容：不堪入目！門將上半場連環「派膠」，下半場全隊大部分時間更喺後場搓波，邊路傳中一隻手數得晒，睇到我同主場球迷一樣，頹晒。如果卡塔爾要出綫，真係要「奇迹」降臨先得喇！

至於今晚就會上演阿根廷對沙特阿拉伯嘅賽事。今屆阿根廷焦點一定落喺美斯身上，事關今屆會係佢最後一次代表國家出戰世界盃。呢位球王攞過無數榮譽，連咁多年都未再拎過嘅美洲國家盃都拎到，艾爾都想佢喺世界盃有個完美結局。

經過上屆世盃嘅慘痛經歷，阿根廷今屆有種煥然一新嘅感覺，自一九年七月開始三十六場比賽不敗，今年六月喺「南美歐洲冠軍盃」淨勝意大利三球，令艾爾印象非常深刻。
　
阿根廷前綫上，拿達路馬天尼斯同迪馬利亞表現對辦，同美斯嘅融合愈嚟愈好，迪保羅、基斯甸羅美路、利辛度馬天尼斯等防守亦相當硬淨。前中後三綫球員發揮穩定，係艾爾覺得比之前改善嘅地方，亦係今屆佢哋成為爭冠熱門嘅主因。

對手沙特阿拉伯再度打入今屆決賽周，球隊勝在有地利，適應高溫問題不大。不過球隊實力始終有限，對上一次可以分組賽出綫，已經數到一九九四年，上屆分組賽更大敗畀俄羅斯五球。

睇埋卡塔爾嘅表現，艾爾覺得中東球隊喺世界盃嘅級數差一大截，沙特第一場就要對狀態大勇嘅阿根廷，相信好難頂得住。艾爾呢場推介阿根廷讓球阿根廷「-2」上盤，半場入球大細「1.5」大都可以考慮。艾爾

立即下載 | 全新《星島頭條》APP : https://bit.ly/3yLrgYZ