般奴費南迪斯等正選上場只列後備嘅球員，估計今仗會落番場。Reuters

最後兩場十六強賽事，艾爾較留意葡萄牙對瑞士。葡軍喺分組賽贏烏拉圭後，已經確立出線資格，面對極之密集嘅賽程，領隊費蘭度山度士決定對南韓一戰作大幅輪換。除咗C朗拿度繼續正選，五人中場有四位球員係後備兵。即使六十五分鐘逐步出番常規正選球員，但全隊進攻組織節奏好慢，完全感受唔到想贏嘅決心。所以，輸畀南韓1:2?敗績絕對唔能夠作準。

再睇法國最後一輪分組賽同樣出盡副選，結果一球僅負突尼西亞，十六強一戰出番基利安麥巴比、基奧特等球員，結果贏波蘭3:1。可想而知，有啲強隊喺分組賽最後一輪輸波，只係「技術性調整」，確保球隊唔好再有太多傷兵。般奴費南迪斯、拉菲爾古里路同魯賓戴亞斯等上場只列後備嘅球員，今仗估計會落番場，同瑞士拼死一戰。

瑞士上仗3:2反勝塞爾維亞，過程非常熱血。不過，塞爾維亞上半場出力太多，下半場好多球員無晒電，後防更加「放題式」崩潰，令瑞士有極多突擊機會。艾爾唔會因為呢場勝仗，就確定瑞士嘅入球攻力大幅改善。始終瑞士前線人腳實力一般，比列安保路、魯賓華加斯等球員把握力非常飄忽。即使領隊耶堅將球隊防守改善，但火力唔強仍然係致命傷。今仗對攻力幾強嘅葡萄牙，又會係另一重考驗。

雙方近五仗碰頭，瑞士只係贏過一次，睇賽績無得打。艾爾覺得葡軍球員實力高過瑞士，但後防始終令人擔心，尤其兩閘球員攻強守弱，瑞士可能會靠突擊攞到入球。今次艾爾推介全場入球大細「2.5」大，般奴費南迪斯「被罰黃牌」嘅首發事項亦可以考慮。　—艾爾


《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ