比利時喺外圍賽以不敗姿態殺入決賽周，卻在分組賽出局。Reuters

尋日喺本欄同大家傾完筆者心目中發揮正面嘅球隊，今日就講下部分令人失望嘅球隊。

首先筆者嘅不二之選就一定係比利時，佢哋喺外圍賽以不敗姿態殺入決賽周，最後喺分組賽出局，陣容上嘅選擇或者早已埋下端倪。夏薩特毫無狀態，但一直佔據正選；繼續重用遠離主流聯賽嘅維頓漢同艾達韋列特；巴舒亞伊全場隱形顯得奇雲迪布尼獨力難支等等。以上種種，當中最大責任當然係已離任嘅領隊馬天尼斯。球隊內部問題亦未能好好處理，令球員喺球場上嘅貌合神離顯而易見。

另一隊就係啱啱十六強互射十二碼出局，高開低走嘅西班牙。首場橫掃哥斯達黎加後，筆者一度以為佢哋今屆會一帆風順，豈料最後一場對日本嘅分組賽在超過八成控球率之下被擊敗。而當中為人詬病是空有控球率。這問題喺對摩洛哥的一場中再次浮現，三人中場繼續猜唔到個波去龍門，印象中全場最對辦嘅射門要去到補時最後一刻沙拉比亞嘅中楣波。至於可能有朋友問點解無德國份？老實講我覺得佢哋今屆踢得唔算好差，只係有少少欠運，加上同西班牙喺對哥斯達黎加嘅次序亦影響咗佢哋出局嘅結果。　—球樂


《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ