法國中堅烏柏美卡奴又不時犯錯，今場對反擊唔錯嘅摩洛哥有一定考驗。Reuters

四強另一焦點大戰，法國對摩洛哥。本報多位名家先後提過，現代足球變化非常快，各隊戰術組織、球員體能、防守部署等逐步成熟，牌面較弱嘅球隊逐漸拉近同強隊嘅距離。誠然，摩洛哥球員質素唔及法國，但仔細再睇，薛耶治、阿舒拉夫、安尼斯利、路曼沙斯、耶辛尼保奴等都喺歐洲五大聯賽搵食，其實都唔係極差。佢哋適應晒講求高位逼搶同體力化嘅足球模式，係摩洛哥防守嘅最強武器。

摩洛哥的防守非常嚴密，就連今屆首位上演帽子戲法嘅干卡路拉莫斯，上仗面對摩洛哥守衞都無乜優勢。同埋，摩洛哥上仗兩閘都有輪換，防守都係咁勁，除咗有賴半個主場嘅震懾力，領隊列格古可以團結呢隊極具個人風格嘅球隊，更加值得鼓掌。還有，摩洛哥唔係踢緊「九零一」足球，防守反擊效率都唔能夠睇小。雖然球隊目前場均預期入球只有零點八，但全隊紀律同配合程度好高，每次都可以製造到具威脅嘅埋門。

法國打破到「衞冕魔咒」，殺到入嚟四強，的確唔簡單。今屆「高盧雄雞」把握力極強，唔止基利安麥巴比、基奧特頭頂腳踢樣樣有，就連曹亞文尼上仗都有「神來之筆」，攻力之強毋庸置疑。不過法國今屆五場賽事，場場都有失波，包括對澳洲先失一球。艾爾講過法國兩閘的防守一般，中堅烏柏美卡奴又不時犯錯，後防唔太穩陣，今場對反擊唔錯嘅摩洛哥有一定考驗。

論質素，法國贏。論整體，艾爾覺得摩洛哥贏。既然係咁，當然要支持下摩洛哥喇，希望「亞特拉斯雄獅」能夠殺入決賽，繼續譜寫呢段童話故事！ —艾爾

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ