見識過今屆「老頑童」莫迪歷，美斯嘅表現後，希望兩位都可以繼續為國上陣。Reuters

首先恭喜阿根廷以3:0擊敗上屆亞軍克羅地亞，率先躋身決賽！比數看似差距巨大，其實不然。尤其克羅地亞上半場落後兩球下依然臨危不亂，其中嘅核心十號莫迪歷，完全發揮咗現代足球全能中場嘅功效。通過佢出色嘅節奏控制，上半場曾一度重演上場對巴西時的情景，對方中場緊逼失效之餘，亦通過短傳數次撕破阿根廷中後場防衞網，就算下半場戰術調整後，中場人數減少失勢，依然見到佢不計體力協防及作為反擊起點嘅身影。

對比莫迪歷，對手美斯更接近傳統十號進攻中場嘅角色，除自己有力獨闖龍潭外，進攻時亦可為隊友穿針引綫，必要時甚至可如對墨西哥時於禁區外施放冷箭打破僵局，集多項進攻功能於一身。而四強下半場美斯交出嘅助攻就係「十號」代表作，憑一己之力擺脫對方守衞，再迅速找到入楔空檔嘅隊友祖利安艾華利斯輕鬆燙入。賽後訪問美斯自言感覺狀態十足，作為看倌亦感覺佢彷彿回到十年前。

克羅地亞於四強止步確實可惜，還幸莫迪歷已於賽前表示不論勝敗仍然願意為國效力，而晉身決賽嘅美斯未知世界盃後會否改變他退出國家隊嘅主意。當然筆者見識佢哋今屆「老頑童」嘅表現後，私心希望兩位都可以繼續為國上陣。  —球樂

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ