林盛斌（Bob）與麥玲玲在昨晚播出的《流行經典50年》合唱《好好戀愛》，二人歌候已震撼觀眾，還要全程拖著手仔，最後Bob更將手壓在麥玲玲胸口，再擺出High爆樣，麥玲玲亦笑晒口！
隨後Bob在社交網貼電視截圖，留言：「得㗎嘞，夠嘞，我知呀，唔使再WhatsApp同PM我，對唔住囉......😒😒😒」，一眾圈中好友都留言，黃翠如一定是錯過了，留言「我要片」；主持陳敏之則謂「首歌真係好難長（隨後更正：唱）」；同在現場擔任嘉賓見證的林子善和孫慧雪分別謂：「最正係唱完首歌個一幕 你做乜嘢將隻手擺喺師傅個心口度」、「正到爆！！」
網民反應更是熱烈，留言兩極又啜核，「樂壇欠你一個獎」、「真心話唔差喎」、「耳朵流產」、「 隔夜飯都爭啲嘔埋出嚟」、「好想打爛部電視」、「真心忍唔到笑」、「真係好難聽」、「唱得唔錯喎，雖然個組合有啲騎呢」、「幾時有街頭busking？」等。