受武漢肺炎疫情影響，港府宣佈幼稚園、小學、中學延長停課至3月1日，面對突如其來的「長假期」，一眾星級家長都諗盡辦法令小朋友冇咁悶，好似胡諾言太太陳琪就選擇留在家中休息，以及與囡囡一齊整嘢食。

至於去年9月才誕下二女Galilee的吳雨霏（Kary），今日就帶埋1歲大仔Asher和狗仔去行山，呼吸一下新鮮空氣之餘，順便當運動強身健體！不過，相中見她背脊孭住28磅的囝囝，又要拖住一隻金毛尋回犬，你都咪話唔攰！好在Kary之後上載了一條片，片中有個壯漢幫手孭BB，估計老公洪立熙都有同行！她又以英文留言，表示產後因要照顧兩個小朋友，導致身體長期受壓，不過Kary仍樂觀面對，努力去適應身體與升呢媽咪的生活變化。