33C無綫小花李君妍（Aurora）因為同住家姐確診新冠肺炎，作為緊密接觸者被安排入住隔離營14天，直至日前(15號)沒事可以「出關」，昨晚她戴住口罩接受《娛樂新聞報導》訪問報平安，她說：「我已經完成咗隔離生活，返咗屋企喇，心情好開心，因為我已經14日冇見過屋企人，不過都有少少擔心家姐嘅情況，佢都仲未出到院，所以希望佢可以盡快好番出院，出到嚟真真正正一家人團聚。」

由於她的家姐確診前夕，李君妍如常返公司拍《姊妹淘》，累得跟她一齊錄影《姊妹淘》的孫慧雪、蔡嘉欣亦進行測試和自我隔離，被網民鬧爆她黑心。因此，她再次公開道歉：「我想再一次向受影響嘅朋友、同事、公司上上下下，講多聲非常唔好意思同抱歉，因為呢件事令大家擔心咗好多，影響到大家嘅生活同情緒，希望大家繼續身體健康，開開心心咁對抗呢個疫情，生活快啲回復正常。」