新冠肺炎肆虐，人氣王姜濤及MIRROR成員Stanley（邱士縉）上周四（16日）出發去咗台灣拍偶像劇，兩人抵台後，喺酒店分開自我隔離14天後才正式入劇組。悶爆嘅姜濤日前無聊影吓酒店房間張雙人大床，鬚根等，雖然咁樣都可以畀姜糖「頂」住先，但大部份姜糖都想睇多啲，唔係幾肯收貨！而且冇見幾日姜B，姜糖真係人都癲。

 

昨晚day 4姜濤終於現身，並玩突然開live，15分鐘直播中，戴住黑色口罩，着住黑色衛衣嘅姜濤開住音樂，坐喺書枱前睇劇本做功課，但仍然不忘撥頭髮，chok住對鏡頭，睇fans回應等，最後他還應粉絲要求，影吓住緊間房係點，又送上一雙笑眼及拜拜手勢，就算冇出過一句聲，仍然2000多人睇他唔講嘢直播。

 

唔少Fans留言話姜濤就算唔出聲，但望住個鏡頭都似女友視覺咁喎，所以就算唔出聲都好鬼正，無聲勝有聲，亦有指可以靜靜地陪伴你好幸福，miss you等。最搞笑係經理人花姐及MIRROR隊友留言寸爆他，花姐說：「老姜，你悶死未？隔離幾日，連嘢都唔識講？」Edan指他扮文青：「乜隔離唔講得嘢㗎咩？」花姐忍唔住插口說：「Edan…你都要去隔離...學習靜啲。」Anson就叫他：「please say something.」隊友同花姐你一句我一句唱和，完全冇欣賞過姜濤嘅chok樣呢！