有「股壇長毛」之稱的獨立股評人David Webb，今年六月突然自爆因為患上前列腺癌，而且已經有轉移情況，所以要放下手頭工作，全力抗癌。不過，經過差不多五個月時間，昨日他已重出江湖，再寫網上文章，雖然今次不是踢爆上市公司財務問題，而是談及香港防疫，但相信他的「粉絲」都會替佢高興！

David Webb的股壇評論文章一向威力勁，好多上市公司被佢睇中踢爆財務造假，或處理股權問題，真係有排煩。最經典係踢爆謎網股，令到多家細價股爆煲，主事莊家一身蟻！

昨日佢再撰文，表示要多謝現代醫藥技術，令到他的癌細胞得到壓制，身體機能回復得唔差，仲識得幽默話「好過立法會」。他說收到好多祝福不能一一道謝，而一些他希望做到的事情，例如不用隔離可以外遊，暫時就做不到。不過，他說會重新調配一些事件的處理優先次序，雖然無可能好似以往咁寫咁多文章，但對於一些社會事件，例如對政府處理疫情的安排則不吐不快。

呢位「股壇長毛」重出江湖，至於他的實際病情如何，抗癌有幾成功佢暫時就未詳細講。