近日天氣寒冷又乾燥，不止人想縮埋一舊，連地磚亦一樣！近日有人發現大廈走廊的地磚，竟然裂開及拱起，令網民相當驚訝。

有網民近日在社交媒體Facebook群組「馬鞍山之友 1.0」上載圖片，指自己當晚在家食食下飯，突然聽到大廈走廊傳出「霹靂啪喇」的聲響，好奇心驅使下，他便出門看個究竟，發現走廊上有不少地磚，因石屎冷縮熱脹的關係，竟「凍」到裂開及拱起，更有幾塊已經移位。事主不禁在帖文中祝福群內網民「今晚真係好凍，馬友保重！」有網民認出地點為欣安邨。

網民看完帖文都如見奇觀，更有網民分享自己所住的地方亦有類似情況，「我屋企都係咁...有十塊大磚凸起左...」，更表示「如果齋睇相以為是地震震爛啲磚」，相當誇張。