疫情下食肆晚市禁堂食，令餐飲業百上加斤。將軍澳一間車仔麵店日前就於網上發文指，有顧客「走單」，下了逾千元外賣，但餐廳將食物送到有關地址時，對方竟聲稱是被人「整蠱」，拒絕收外賣及付款，令餐廳要承受損失，無奈求大家「請尊重所有餐飲業的同事並珍惜食物！」

該車仔麵店在Facebook發文指，當日下午2點，顧客「劉生」打電話叫外賣，點了大約十幾人的份量，盛惠1021元。雖然該店向來靠外賣平台接單，但考慮到對方留下地址就在店舖附近，亦留下了手提電話，所以在沒有收取訂金的情況下趕起訂單，並派出3個職員送外賣。

不過，職員到達該地產公司時，一位經理要求他們離開，「話呢度係有劉生，但劉生今日無返工，仲趕哂我哋同事出門，搞到負責跟單嘅女同事委屈到喊！」當職員再打電話給劉生時，劉生竟稱是「俾人整蠱」。餐廳最後慘損失千元，職員都相當氣憤，「你俾人整蠱咩？跟住就可以拍拍囉柚扮乜事都無，但係我哋成班同事就真係俾人整蠱喎！」

餐廳訴苦稱，疫情下無得做晚市堂食，再加2人限聚，本來已經守得好辛苦，「唔雪中送炭都算啦！點解要咁樣浪費同事時間同心機，仲要浪費咁多食物！」餐廳坦言，疫情期間做外賣都幫補不到，「好簡單一個問題，我哋寶琳店全場40、50個位，一日要做幾多個外賣先可以補到！如果只係貪好玩，唔該睇下今時今日嘅香港、望下所有外賣同食物、再撫心自問一下良心過唔過意得去！」

帖文引起熱議，不少網民都留言批評「叫劉生交代下俾邊個玩」、「成千蚊食材.. ... 人哋想食都無得食，佢就講笑無道歉就完事」、「扮睇盤放佢飛機啦」，也有人就認為地產公司拒絕接單情有可原，「如果真係俾人整蠱，都要夾硬食咗張單佢？」有網民就提醒，「下次咁大張單就先打電話double confirm， 千多元車仔麵都知有問題喇」，更有好心人稱「你放係到收工來幫你買部份呢啲外賣走，唔好倒」。