袁文傑於去年平安夜宣布跟拍拖9年的女友張潔蓮（Jackeline姐姐）拉埋天窗，今日他出席TVB處境劇《愛．回家之開心速遞》新春活動時，被問到首次以人夫身分派利是感覺如何？袁文傑笑道：「入行多年都有派開工利是，Jackeline感覺會大啲，佢一直都好想人哋叫佢做袁太。」談到農曆新年大部分時間於工作中渡過，袁文傑透露現正同時拍兩套新劇，更有可能同時拍3套．記者即笑指Jackeline好旺夫，他笑謂：「係㗎！我屬猴，佢屬龍，係好夾㗎！中國人都係呢個思考方式。」