農曆新年假期過後各行各業陸續開市復工，已婚或高層員工都會派利是，祝願同事開工大吉，但係一個不小心派錯利是，就隨時令開心場面變成尷尬。有網民早前就重提過去公司同事派錯利是，上演「高手過招」埸面，成為網民熱烈討論的話題。

有網民在「辦公室日報」專頁投稿中憶述，某年農曆年初返工，已婚同事周圍派利是，但公司高層A隔日就向其他同事吐苦水，話派錯咗一封500元利是給另一名同事L，苦惱如何向對方取回：「好唔好問佢拎返呢？」

原來那封利是由公司老闆派給該高層A的女兒，他收到後隨手將利是塞入褸袋，但一轉眼便看到同事L，就錯手將利是給對方了。直至晚上，高層A得知老闆封了500元利是給其他高層的兒子，他欲查看老闆封多少錢給女兒，才驚覺找不到該封利是， 證實自己派錯利是。

正當高層A為是否討回利是而苦惱之際，同事L同日下午竟然將利是主動歸還：「你派錯利是，呢封銀碼好大。」高層A對此有點反應不及：「吓，有啲咁嘅事？我都唔知添，咁大頭蝦都有嘅，哈哈！下次唔使畀返我啦，派咗出去就係㗎嘛，心意嚟㗎，你唔講我都唔覺。」

事主目睹高層A的變臉，大嘆「高層啲演技係唔同啲。」同事L歸還利是之餘，也不忘開玩笑打圓場：「唔得唔得，以我哋交情冇理由咁大銀碼，我會驚㗎」，「你搞到我第時喺公司唔敢執番梘。」高層A連聲道謝，又係咁講唔好意思，連隨從褲袋取出「特別加碼」的100蚊利是給同事L。

今次辦公室高手過招的真相，原來是知情的同事將高層A派錯利是一事告知同事L，即是高層A毫不介意的樣子，其實一早已被看破。知道了事情的來龍去脈後，樓主更不禁大嘆一句：「媽，好尷尬呀！」

網民看過這段派錯利是的尷尬事，有人直言演技是辦公室中生存之道：「公司真係好多呢啲虛偽野 」、「辦公室生存之道一定係Oscar演技級別。」

亦有人認為A作為高層，實在不應太小家：「其實五舊水啫，仲係一封啫，仲要係收返黎，都禁介懷，仲話高層喎。」