黎諾懿日前為代言奶粉跟福幼基金會義工落區送暖，向土瓜灣劏房基層家庭派發禮物籃，除了跟基層市民有講有笑外，還為其中一個家庭的小朋友大唱生日歌預祝生辰。
諾懿近年新春前後都積極行善，希望將關心給予有需要的人，也希望囝囝「小春雞」能承傳他的善心，惟疫情下未能帶同囝囝出來，但他讓小春雞一起執禮物籃，學習分享。他說：「佢大個之後，會同佢身教，帶佢去柬埔寨或者窮困地方做義工，想佢學懂珍惜。」
今次落區探訪，諾懿見到每個家庭都好開心，「雖然居住環境較細，但佢哋嘅笑容係好開心，其中一個小朋友屋企仲布置好晒，準備慶祝生日。」諾懿不諱言此行勾起不少童年回憶：「自己細個雖然窮，但好開心，物質上係冇乜，不過我哋會有自己娛樂，例如用膠紙包住書包當踢波。」
探訪期間，諾懿不時被催促「快啲生多個」，他笑言一直都有造人計劃：「繼續進行中，身邊人不斷催我，但個天可能唔想我喺疫情下生小朋友呢，個個都好着急，Bob（林盛斌）以為我唔得，成日話畀啲藥我食，其實太太都着急，始終佢都想有仔趁嫩生，希望快啲有好消息同大家講。」