一名港媽表示，與丈夫已育有3女，但奶奶卻以「家庭冇仔唔完整」為由，不斷強迫她「追仔」。資料圖片（示意圖）
有女網民在「香港討論區」以「已經有三個女，奶奶仲想我追多個仔……」為題發文，指自己與丈夫已育有3名女兒，不過奶奶為人傳統，即使丈夫並非「九代單傳」，其他兄長及堂兄弟亦全部育有兒子，但奶奶仍覺得「一個家庭冇番個仔唔叫完整」，於是不斷強迫樓主「追仔」。
樓主表示，丈夫的人工不高，本來要養3名女兒已感吃力，近兩年女兒開始長大，她才可出外做兼職幫補家計，「家吓我出埋去做嘢，已經緊緊夠，3個女照顧已經差少少，我又要返工，又要照顧佢哋。」她認為，若再多生一個孩子的話，便要再花全副心機及時間去照顧幼兒，不但會失去她現時的工作，丈夫的人工亦不夠養4名孩子。
不過，樓主的丈夫卻「衰心軟」，前前後後說服樓主生多個，「話生多個仔畀奶奶，等佢老人家了個心願……呢段時間老公晚晚都同我講『生多個生多個』咁，真係好煩……」她坦言，一旦再生多一名女兒，奶奶應該會繼續逼她「追仔」，而且奶奶除了不會幫忙照顧小朋友，亦不會在財政上作出幫忙，「佢唔使我哋畀錢養佢都偷笑。」
此事引來網民熱議，不少人認為這個議題上不應由丈夫或奶奶主導，建議樓主「企硬」，「生唔生你自己話事，換成我一個已經夠」、「你太軟弱，換成我早就離婚」、「依家2021唔係民初，生唔生女人話事，唔係老公，更加唔輪到奶奶出聲」。
另外，亦有網民指若家庭經濟不能負擔的話，更不應生多個辛苦大家，而是要花時間及心機盡力照顧好3名女兒，「不如好好培養個三個女先」、「經濟有困難生唔到第四個就算。重要係教好三個女！」、「何必咁執著？！最緊要小朋友健康，讀好書，將來有成就，先最重要。」
