譚耀文喺新片《逃獄兄弟》中都有好大發揮，唔止同張建聲對打，飾演老婆伍詠薇及囡囡陳漢娜跟他有好多互動情節。
片中阿譚有場同張建聲肉搏戲。
首次同伍姑娘合作做兩公婆，好有新鮮感。
片中同栢天男冇乜打戲，但劇情講阿譚被栢天男嘔到一身都係。
阿譚隔住木板同栢天男玩「心口碎大石」。
譚耀文，張繼聰，張建聲，栢天男等，着住對監犯鞋喺操場勁跑、打籃球刮雙腳起水泡。
之前阿譚同古天樂拍《龍在邊緣》都受過傷。
阿譚以前經常跟師傅梅艷芳周圍演出。
拍《葉問3》被泰臣對打驚足十世
阿譚拍咗10幾年打戲有一定經驗、心得及技巧，他坦承最怕同欠缺經驗嘅新人對打，所以今次同栢天男交手都會特別緊張，幸而對方表現鎮定，唔算驚驚青青，咁樣合作起嚟會安心啲：「咁耐以嚟我畀人打傷多不勝數，有啲都記得，但唔點名講，費事以為我記仇。做新人時都試過打傷人。而一生人最驚最驚，甚至驚足十世，最危險一次係拍《葉問3》畀泰臣打，大家知泰臣喺擂台上打到對方入晒『廠』，甚至咬甩耳仔，不過佢好清楚只係拍戲，而經驗話我聽，愈識打嘅人，拍戲會愈小心。」
《龍在邊緣》向古仔開槍痛心疾首
另外，之前他同古天樂拍《龍在邊緣》都好傷：「當時劇情講我見到古天樂走過，以為對方喺我前面，就向鏡中嘅古天樂開槍，因為樓底好矮，冇諗到六分厚玻璃會被開槍聲音震碎，爆玻璃搞到我塊面花晒，簡直係痛心疾首，好彩玻璃冇入眼，而醫院又喺附近，最後極速去醫院洗傷口。好記得嗰晚仲要做梅艷芳2001年演唱會嘉賓，載歌載舞演唱《烈燄紅唇》，因為拍戲同唱歌兩樣都係我鍾意做嘅嘢，就算負傷仍堅持去演出，呢件事令我一生難忘。」
