李璨琛的「網紅囡囡」Lucy（李元元）今日（25/3）3歲生日，即收到一份最佳生日禮物。事緣多得媽咪梁志瑩（Pae）上周在Lucy的ig，上載Lucy扭腰揈頭跳唱韓國YG娛樂旗下人氣女團BlackPink（BP）的《BOOMBAYAH》，片段昨日被有5,600多粉絲的社交網轉載，上載至今不足24小時已逾百萬點擊，Pae昨夜才貼上載圖，搞笑留言：「搞咗咁耐，終於都去到呢個國際大舞台 #我條catwalk大天橋呢 #飛躍女藝人獎仲唔係我」，網民紛紛留言笑指「可能成為YG年紀最細練習生」、「好勁 遲啲大把經理人搵你」等。
然後Pae今日再貼文，稱就連BP的經理人也在ig story貼上Lucy舞動照。Pae留言：「一瞓醒收到千9幾萬個message話俾（畀）我知，阿blackpink個經理人post左妃LU，呢件事我真係笑到backpain，咩事呀成件事係咪搞笑㗎 #頒埋個終生榮耀大獎俾（畀）你啦妃LU」，網民笑指「官方認證了」、「最佳生日禮物」等。